एजेन्सी । भारतका विकेटकिपर तथा ब्याट्सम्यान केएल राहुलले चोटका कारण एशिया कप २०२३ को समूह चरणका खेल गुमाउने भएका छन् । भारतले समूह चरणमा दुई खेल खेल्नुपर्नेछ । पहिलो खेल सेप्टेम्बर २ मा पाकिस्तानसँग र दोस्रो खेल सेप्टेम्बर ४ मा नेपालसँग हुनेछ ।
भारतीय टोलीका मुख्य प्रशिक्षक राहुल द्रविडले मंगलबार पत्रकार सम्मेलनमा केएल राहुल अहिले बेंगलुरुस्थित राष्ट्रिय क्रिकेट एकेडेमी (एनसीए)मा रहने बताएका छन् ।
एसिया कप सुपर–४ चरणअघि सेप्टेम्बर ४ मा टोलीमा उनको पुनरागमन हुनेबारे पुनः घोषणा गरिनेछ । राहुल एसिया कपका लागि घोषणा गरिएको १७ सदस्यीय टोलीमा परेका छन् ।
द्रविडका अनुसार एनसीएमा पछिल्लो एक सातामा राहुलले निकै राम्रो प्रदर्शन गरेका छन् । ‘राहुलमा प्रगति देखिन्छ । हामी राहुललाई पूर्ण रूपमा फिट हुन थप समय दिन चाहन्छौं । उसले पुनरागमन गर्नेमा म विश्वस्त छु । तत्कालका लागि राहुल टोलीसँग यात्रा गर्ने छैनन् ।’ उनले भने ।
