एजेन्सी । फिफा महिला विश्वकप २०२३ अन्तर्गत दोस्रो सेमिफाइनल खेल आज बुधबार हुँदैछ ।
फाइनलमा स्थान पक्का गर्न आयोजक अष्ट्रेलिया र इंग्ल्याण्ड आमनेसामने हुँदैछन् । खेल नेपाली समयानुसार ३ः४५ बजे सुरु हुनेछ । सिड्नी ओलम्पिक स्टेडियममा घरेलु दर्शकको समर्थनको फाइदा उठाउँदै अष्ट्रेलिया फाइनलमा पुग्न चाहन्छ ।
यता, घरेलु मैदानमै अष्ट्रेलियालाई स्तब्ध पार्दै इंग्लाण्ड पनि तेस्रोपटक सेमिफाइनलमा स्थान बनाउने मनसायका साथ मैदानमा उत्रनेछ ।
क्वाटरफाइनलमा इंग्ल्याण्डले कोलम्बियालाई २–१ ले पराजित गर्दै सेमिफाइनलमा स्थान बनाएको थियो । यस्तै, अष्ट्रेलियाले फ्रान्सलाई पेनाल्टीमा ७–६ ले हराउँदै सेमिफाइनलमा स्थान बनाएको थियो ।
आजको खेलको विजेताले उपाधिका लागि स्पेनसँग खेल्नेछ । मंगलबार भएको पहिलो सेमिफाइनलमा स्वीडेनलाई २–१ गोलले पराजित गर्दै स्पेनले फाइनलमा स्थान बनाएको हो । यस्तै, आजको खेलको पराजित टोलीले स्वीडेनसँग तेस्रो स्थानका लागि प्रतिस्पर्धा गर्नेछ ।
