काठमाडौँ । अर्थमन्त्री डा प्रकाशशरण महतले त्रिभुवन अन्तर्राष्ट्रिय विमानस्थलबाट हुने तस्करी वा अन्य अवान्छित गतिविधि नियन्त्रणमा सबै सरकारी निकायले निराश नभई समन्वयात्मक ढंगले काम गर्नुपर्ने बताउनुभएको छ ।
करिब एक क्विन्टल सुन प्रकरणमा पनि एउटा सरकारी निकायको सूचनाको आधारमा अर्को सरकारी निकायले बरामद गरेको प्रति टिप्पणी गर्दै उहाँले सबै सरकारी निकायबीच समन्वायत्मक भूमिका आवश्यक रहेको बताउनुभयो ।
बिहीबार त्रिभुवन अन्तर्राष्ट्रिय विमानस्थल भन्सारको स्थलगत अनुगमनपछि पत्रकारहरुसँग कुरा गर्दै मन्त्री महतले विमानस्थलमा रहेका राजश्व अनुसन्धान विभाग, भन्सार विभाग, जनपद प्रहरी, सशस्त्र प्रहरी, नेपाली सेना र नागरिक उड्डयन प्राधिकरणबीच राम्रो समन्वय भए अपराध न्यूनीकरण हुने बताउनुभयो ।
उहाँले विमानस्थलामा जडित प्रविधिलाई पनि समयअनुकूल स्तरोन्नति गर्नुपर्ने धारणा राख्नुभयो । प्रविधिलाई स्तरोन्नति गर्नका लागि चाहिने कुराहरुमा पनि अर्थ मन्त्रालयले पूरा सहयोग गर्ने उहाँको भनाइ थियो ।
“एउटैको भूमिकाले पूरा नतिजा आउँदैन । नाकालाई दुरुपयोग गर्ने, तस्करी गर्ने, अवैध कारोबार गर्ने प्रवृत्तिलाई टोटल रोक्नका लागि सबै निकायको समन्वयकारी भूमिका आवश्यक छ”, उहाँले भन्नुभयो, “कुनै बहानामा हामीले उदासीनता देखाउने या आ–आफ्नो जिम्मेवारीमा क्रियाशील नहुने मान्य हुन सक्दैन ।”
“आउँदा दिनमा कुनै पनि छुट, कुनै पनि तहबाट, कुनै पनि बहानामा हुन नदिनेतर्फ सम्पूर्ण प्रयास उहाँहरुले गर्नुहुन्छ, भन्ने मैले विश्वास लिएको छु”, मन्त्री महतले भन्नुभयो ।
उहाँका अनुसार त्रिभुवन विमानस्थल भन्सारबाट क्विन्टल सुन कसरी बाहिरिन सफल भयो भन्ने विषयमा अनुसन्धान जारी रहेको छ । स्वतन्त्ररुपमा अनुसन्धान प्रक्रिया अघि बढिरहेको भन्दै उहाँले त्यसमा अर्थ मन्त्रालयले पूरा सहयोग गर्ने बताउनुभयो ।
