एजेन्सी । फ्रेन्च फरवार्ड केलियन एम्बाप्पेको पेरिस सेन्ट जर्मेन (पिएसजी)सँगको सम्झौता एक वर्ष बाँकी छ । तर, उनी पिएसजीमै रहने भन्नेमा अन्योल छ ।
एम्बाप्पे नयाँ सिजनअघि नै पिएसजी छाड्ने मनस्थितिमा छन् । पिएसजी प्रि–सिजनको तयारीका लागि जापान र दक्षिण कोरियाको भ्रमणमा निस्किँदा एम्बाप्पे भने टोलीमा समावेश छैनन् ।
उनी स्पेनिस क्लब रियल मड्रिडमा जान चाहन्छन् । यसैबीच, साउदी अरेबियाको अल हिलालले उनलाई भित्र्याउन १७३.२ मिलियन पाउन्डको प्रस्ताव राखेको छ । फ्रेन्च खेलाडीमाथि साउदी अरेबियाको अल हिलालले ‘मेगा बजेट’ प्रस्ताव राखेको हो ।
२४ वर्षीय एम्बाप्पे साउदी प्रो लिगमा आबद्ध हुँदा अहिलेसम्मकै हाई प्रोफाइल खेलाडी बन्नेछन् । सन् २०१७ मा मोनाकोबाट एम्बाप्पेलाई क्लबमा भित्र्याउन पिएसजीले १५५ मिलियन पाउन्ड खर्चेको थियो ।
पब्लिक इन्भेस्टमेन्ट कोषका माध्यमबाट हिलालले एम्बाप्पेलाई यसै सिजन भित्र्याउने कोसिसमा रहेको बताइन्छ । साउदी क्लबले कम्तीमा दुई वर्षको सम्झौता गर्नेछ ।
तर, पिएसजीका अध्यक्ष नासेर अल खालैफीले भने फ्रेन्च खेलाडी एम्बाप्पेलाई छाड्न नसकिने स्पष्ट पारेका छन् । फ्री ट्रान्सफरका मध्यमबाट मड्रिड जाने योजना बनाएका उनीसँगको सम्झौता बाँकी रहेको नासेर जिकिर गर्छन् ।
