काठमाडौं । नेपालले सेन्ट्रल एसियन भलिबल एसोसिएसन (काभा) पुरुष भलिबल नेसन्स लिगको सबै खेलमा हार बेहोरेको छ ।
किर्गिस्तानमा जारी काभा पुरुष भलिबल प्रतियोगितामा नेपाल लिग चरणका ६ वटै खेलमा पराजित भएको हो । आइतबार भएको आफ्नो अन्तिम तथा छैटौँ खेलमा नेपालले उज्बेकिस्तानसँग ३–० को सोझो सेटमा पराजय भोग्यो ।
बिस्केटस्थित स्पोर्ट्स एण्ड रिक्रिएसन कम्प्लेक्समा भएको खेलमा उज्बेकिस्तानले नेपालमाथि २५–२१, २५–२२, २५–२३ को नतिजा निकालेको हो । यसअघि नेपाल पहिलो खेलमा मङ्गोलिया, दोस्रो खेलमा आयोजक किर्गिस्तान, तेस्रो खेलमा इरान, चौथो खेलमा तुर्किमिनिस्तान र पाँचौँ खेलमा आयोजक किर्गिस्तानको ‘बी’ टिमसँग पराजित भएको थियो ।
लिगमा नेपालसहित आयोजक किर्गिस्तानको दुई, इरान, मङ्गोलिया, तुर्किमिनिस्तान र उज्बेकिस्तान गरी सात टिमको सहभागिता रहेको थियो ।
सिङ्गल राउन्ड रोबिन लिगको आधारमा सञ्चालित प्रतियोगिताको शीर्ष दुई टिमले उपाधिका लागि प्रतिस्पर्धा गर्नेछन् । साथै लिगको तेस्रो र चौथो टिम तेस्रो स्थानका लागि भिड्नेछन् ।
