एजेन्सी । क्यानडाको क्यूबेक र अन्टेरियामा लागेको डढेलोका कारण छिमेकी मुलुक अमेरिकाको न्यूरोर्क शहर प्रदुषित बनेको छ । सीएनएनमा प्रकाशित समाचार अनुसार डढेलोका कारण न्यूयोर्कमा धुँवा फैलिँदा त्यहाँको जनजीवन प्रभावित बनेको छ ।
अत्यधिक धुँवाका कारण बालबालिकाहरु घरबाहिर निस्कन पाएका छैनन् भने हवाई उडान पनि प्रभावित बनेको छ । न्यूयोर्कका लाखाैँ मानिसहरु अस्वस्थ हावामा श्वास फेर्न बाध्य भएका छन् ।
समाचार अनुसार अमेरिकाको पूर्वी क्षेत्रका ७५ मिलियन मानिसहरु एयर क्वालिटीकाे अलर्टमा छन् । फिललान्डेल्फिया, जर्सी सिटी, न्यू जर्सी, न्यू हेभल, कनेक्टिकट क्षेत्रमा दुषित हावा २०० देखि ३०० सम्म मापन गरिएको छ । जुन निकै अस्वस्थ मानिन्छ ।
न्यूयोर्कमा भने एक्यूआई (एयर क्वालिटी इन्डेक्स) ४८४ सम्म पुगेको छ । जसलाई निकै खतरनाक मानिन्छ । जुन न्यूयोर्कको हकमा सन् १९६० यताकै सबैभन्दा प्रदुषण हो । क्यानडामा भइरहेको आगलागी नियन्त्रणका लागि अमेरिकी सरकारले ६०० भन्दा बढी अग्नि नियन्त्रक पठाएर सहयोग गरिरहेको छ । यसका लागि क्यानडाका प्रधानमन्त्री जस्टिन ट्रुडोले अमेरिकी राष्ट्रपति जो बाइडेनलाई धन्यवाद दिनुभएको छ ।
