एजेन्सी । चेन्नई सुपर किंग्सलाई आईपीएल २०२३ को च्याम्पियन बनाउन महत्वपूर्ण भूमिका खेलेका विस्फोटक ओपनर ऋतुराज गायकवाडले विवाह गरेका छन् ।
गायकवाडले शनिबार राति महाराष्ट्रका क्रिकेटर उत्कर्षा पवारसँग लगनगाँठो कसेका हुन् । ऋतुराज र उत्कर्षको विवाह महाबलेश्वरमा भएको थियो । यस वर्ष विवाह गर्ने ऋतुराज पाँचौं भारतीय क्रिकेटर हुन् । यसअघि शार्दुल ठाकुर, हार्दिक पाण्ड्या, अक्षर पटेल र केएल राहुलले पनि विवाह गरेका थिए ।
उत्कर्षा महाराष्ट्रका क्रिकेटर हुन् । उनले आफ्नो राज्यको लागि खेलेकी छन् । उनी दायाँ हाते अलराउन्डर हुन्, जसको अर्थ उत्कर्षाले ब्याटिङ र बलिङ दुवै गर्छिन् । उनले नोभेम्बर २०२१ मा सिनियर महिला ओडीआई ट्रफीमा पञ्जाबविरुद्ध आफ्नो अन्तिम खेल खेलेकी थिइन् । हाल उनी इन्स्टिच्युट अफ न्यूट्रिशन एण्ड फिटनेस साइन्स, पुणेमा अध्ययनरत छिन् । उत्कर्षाको जन्म १३ अक्टोबर १९९८ मा भएको थियो ।
ऋतुराजले बिहेका लागि टिम इन्डियाबाट बिदा लिएका छन् । उनी विश्व टेस्ट च्याम्पियनसिपको फाइनल भारतीय टोलीको हिस्सा थिए । उनी स्ट्यान्ड बायको रूपमा चयन भए पनि आफ्नो नाम फिर्ता लिए । ऋतुराजको स्थानमा यशस्वी जैसवाललाई मौका दिइएको छ ।
