काठमाडौँ । क्रिकेटर सन्दीप लामिछाने विश्वकप छनोटको अभ्यास खेल खेल्न भोलि दक्षिण अफ्रिका जाने भएका छन् । जिल्ला अदालत काठमाडौँले उनीविरुद्दको मुद्दाको पेशी असार २९ लाई सारेपछि नेपाल क्रिकेट संघ (क्यान)ले सन्दीपलाई भोलि नै दक्षिण अफ्रिका पठाउन लागेको हो ।
राष्ट्रिय क्रिकेट टोली भने मंगलबार नै दक्षिण अफ्रिका प्रस्थान गरिसकेको छ । अदालतमा विचाराधीन मुद्दाका कारण सन्दीप उक्त टोलीमा छुटेका थिए । प्रत्येकपटक पेशी तोकिएको २१ दिनभित्र अनिवार्य अदालत उपस्थित हुनुपर्ने प्रावधानका कारण सन्दीप रोकिएका हुन् ।
सन्दीपका वकिलहरूले अदालतलाई अर्को पेशी डेढ महिना पछाडि सार्न निवेदन दिएका थिए । अदालतले सो निवेदनलाई स्वीकृत गरेसँगै सन्दीपलाई दक्षिण अफ्रिका जाने बाटो खुलेको हो ।
दक्षिण अफ्रिकामा नेपालले चारवटा अभ्यास म्याच खेल्दैछ । त्यसपछि त्यतैबाट जिम्बाबेमा हुने विश्वकपको ग्लोबल क्वालिफायरमा नेपालले भाग लिने छ ।
महत्त्वपूर्ण प्रतियोगितामा सन्दीप छुट्दा नेपालका लागि महँगो पर्न सक्ने थियो । त्यसैले क्यानले उनलाई लैजान आवश्यक पहल गरिरहेको थियो ।
असार २९ गतेभन्दा अगाडि पेशी नतोकिने भएकाले सन्दीपले जिम्बाबेमा क्वालिफायर खेल्न भ्याउनेछन् । क्यानका प्रवक्ता दुर्गाराज पाठकले सन्दीपलाई भोलि नै पठाउने गरी आवश्यक तयारी गरिएको बताए ।
