काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछानेले चितवनका सफल व्यवसायी शंकर कंडेल आत्महत्या प्रकरणको अनुसन्धानमा कुनै कमी नहोस् भनेर निरन्तर खबरदारी गरिरहेको बताउनुभएको छ ।
सामाजिक सञ्जाल फेसबुकमा उहाँले घटनामा राजनीतिको रङ्ग नपोतियोस् भनेर सचेत रहेको भन्दै आफू सत्य, न्याय र पीडितको पक्षमा रहेको उल्लेख गर्नुभएको छ ।
कंडेलको परिवारसँग आफू निरन्तर संवादमा रहेको र प्रहरी प्रशासनलाई घटनाको अनुसन्धानमा कसैले प्रभावित नपारोस् भनेर घच्घच्याइरहेको बताउनुभएको छ । साथै सभापति लामिछानेले आर्थिक समस्यासँग लडिरहेको चितवनमा बन्द हड्ताल केही नहोस् भनेर संयमपूर्वक सबै घटनाक्रमलाई नजिकबाट नियालिरहेको उल्लेख गर्नुभएको छ ।
उहाँले भन्नुभएको छ, “म जिम्मेवार जनप्रतिनिधिको भूमिका निरन्तर निर्वाह गरिरहेको छु। चितवनले एउटा असल मानिस गुमाएकोमा अत्यन्तै दु:खी छु। परिवारलाई सहन सक्ने शक्ति मिलोस् भनी निरन्तर प्रार्थना गरिरहेको छु।”
