काठमाडौँ । प्रधानमन्त्री पुष्पकमल दाहाल ‘प्रचण्ड’को आह्वानमा सत्ता गठबन्धन दलहरूको बैठक जारी छ । प्रधानमन्त्रीको सरकारी निवास बालुवाटारमा सरकारमा रहेका शीर्ष नेताहरूबीच छलफल चलिरहेको प्रधानमन्त्री दाहालका स्वकीय सचिव रमेश मल्लले जानकारी दिनुभयो ।
बैठकमा सरकारलाई समर्थन गर्ने दलहरूलाई सरकारमा ल्याउने विषयमा छलफल हुने बताइएको छ । सरकारलाई समर्थन गरेको दल राष्ट्रिय स्वतन्त्र पार्टीलाई मन्त्रिपरिषद्मा सहभागी गराउनेबारे प्रधानमन्त्री दाहालले सत्तारुढ दलहरूसँग छलफल थाल्नुभएको हो ।
रास्वपाले सरकारमा सहभागी हुने कि प्रतिपक्षमा जाने भनी निर्णय गर्न आगामी शुक्रबार केन्द्रीय समिति र संसदीय दलको संयुक्त बैठक बोलाएको छ ।
सरकारमा हाल नेपाली कांग्रेस, माओवादी केन्द्र, जनता समाजवादी पार्टी, एकीकृत समाजवादी पार्टी, नागरिक उन्मुक्ति पार्टी सहभागी छन् । रास्वपा, नागरिक उन्मुक्ति, लोकतान्त्रिक समाजवादी पार्टी, राष्ट्रिय जनमोर्चालगायतले सरकारलाई समर्थन दिएका छन् ।
