काठमाडौं । ओडिआईमा सर्वाधिक छिटो १०० विकेटको किर्तिमान राखेका स्पिनर सन्दीप लामिछानेलाई क्यानले एक लाख नगद पुरस्कार दिएको छ ।
आजको कतारविरुद्धको म्याचपछि सन्दीपलाई ट्रफी र नगद पुरस्कार हस्तान्तरण गरिएको हो । सन्दीपलाई उनको तस्वीरसहितको फोटो फ्रेम र ट्रफी दिइएको छ ।
आज कतारविरुद्धको म्याचमा अलराउन्डरको प्रदर्शन गरेका सन्दीप प्लेयर अफ दी म्याच समेत बनेका छन् । उनले ब्याटिङमा सर्वाधिक ४२ रन बनाएका थिए भने बलिङमा ५ विकेट लिएका थिए । सन्दीपको उत्कृष्ट प्रदर्शनको बलमा नेपाल समूह ए को विजेता बन्दै सेमिफाईनलमा पुगेको छ ।
प्लेयर अफ दि म्याच बनेपछि सञ्चारकर्मीहरुसँग बोल्दै सन्दीपले ब्याटिङमा नेपालले १५० रन कटाएपछि जितको आशा जागेको बताए । बलिङको कुरा गर्दा फ्यानहरुको समर्थन र मायाले आफूलाई उर्जा मिलेको उल्लेख गरे ।
