एजेन्सी । अर्जुन तेन्दुलकरले आईपीएल २०२३ मा सनराइजर्स हैदरावाद विरुद्ध आफ्नो टोली मुम्बई इन्डियन्सलाई जिताएपछि बुबासँग भएको कुराकानी खुलासा गरेका छन् ।
अर्जुनका लागि यो खेल अविस्मरणीय रहनेछ, किनकि यो खेलमा उनले आफ्नो आईपीएल करियरको पहिलो विकेट लिएका थिए । २३ वर्षीय अर्जुनले २० औं ओभरमा उत्कृष्ट बलिङ गर्दै आईपीएलको पहिलो विकेट लिएका हुन् । यस क्रममा उनका पिता सचिन तेन्दुलकर पनि ड्रेसिङ रुममा उपस्थित थिए ।
यस खेलमा १९३ रनको लक्ष्य पछ्याएको हैदरावादको टोलीलाई जितका लागि अन्तिम ओभरमा २० रन आवश्यक थियो । यो ओभरमा अर्जुनले भुवनेश्वर कुमारलाई पेभिलियन पठाए । योसँगै मुम्बईले खेल १४ रनले जित्यो ।
खेलपछि आफ्नो खेलको बारेमा कुरा गर्दै अर्जुनले भने, ‘आईपीएलमा आफ्नो विकेट पाउनु पक्कै राम्रो थियो । हामीले हातमा के छ, योजना के थियो र कसरी कार्यान्वयन गर्ने भन्नेमा मात्र ध्यान केन्द्रित गर्नु थियो ।’
अर्जुनले थपे ‘मलाई बलिङ मन पर्छ, कप्तानले भनेजति बेला बलिङ गर्न पाउँदा म खुसी छु । म टिमको योजनामा अडिग रहने र आफ्नो उत्कृष्ट प्रदर्शन गर्ने प्रयास गर्छु । हामी (सचिन तेन्दुलकर र अर्जुन) क्रिकेटको रणनीतिबारे छलफल गर्छौं । मलाई हरेक खेल अघि अभ्यास गरेको कुरामा अडिग रहन मेरो बुबाले भन्नुहुन्छ । हरेक खेलअघि मलाई बुबाले सल्लाह दिनुहुन्छ ।’
यस खेलमा मुम्बई इन्डियन्सले पहिले ब्याटिङ गर्दै १९२ रन बनाएको थियो । क्यामरन ग्रीनले आईपीएलमा आफ्नो पहिलो अर्धशतक प्रहार गर्दै अविजित ६४ रन बनाए । त्यस्तै, तिलक वर्माले १७ बलमा ३७ रन बनाए । जवाफमा हैदरावादका मयंक अग्रवाल (४८ रन) र हेनरिक क्लासेन (३६ रन) ले आफ्नो टोलीलाई लक्ष्यको नजिक लैजाने प्रयास गरे पनि दुवैले आफ्नो टोलीलाई जिताउन सकेनन् ।
