काठमाडौँ । रवि लामिछाने नेपाली नागरिकता लिन आइतबार जिल्ला प्रशासन कार्यालय काठमाडौँ पुग्नुभएको छ । उहाँ पुग्नुअघि नै प्रशासन कार्यालयमा भीड लागिसकेको थियो । भीड बढेपछि प्रहरी पनि बाक्लोरुपमा परिचालन भएको छ ।
लामिछानेले अमेरिकी नागरिकता त्यागे पनि पुनः नेपाली नागरिकता लिने प्रक्रिया पूरा गर्नुभएको थिएन ।
उहाँले पुनः नेपाली नागरिकता नलिएको भनी मुद्दा परेपछि सर्वोच्च अदालतले गत शुक्रबार उहाँको सांसद पद बदर गरेको थियो । सांसद पद बदर भएसँगै उहाँ उपप्रधानमन्त्री एवं गृहमन्त्री, राष्ट्रिय स्वतन्त्र पार्टीको सभापति र सोही पार्टीको संसदीय दलको नेताबाट पनि विमुख हुनुभएको थियो ।
