काठमाडौं । लुम्बिनी प्रदेशलाई ६ विकेटले हराउँदै नेपाल पुलिस क्लब प्रधानमन्त्री कप क्रिकेट प्रतियोगिताको सेमिफाइनलमा पुगेको छ ।
त्रिवि क्रिकेट मैदानमा लगातार तेस्रो जितको क्रममा पुलिसले लुम्बिनीलाई ६ विकेटले हराएको हो ।
लुम्बिनीले दिएको १ सय ८९ रनको लक्ष्य पुलिसले ३७.१ ओभरमा ४ विकेट गुमाएर पूरा गर्यो । पुलिसका कप्तान दिपेन्द्रसिंह ऐरीले अविजित ४३ रनको इनिङ खेले । उनले ६६ बलमा चार चौका प्रहार गरे ।
ओपनर ब्याटर सुनिल धमलाले २६ बलमा ३६ रन बनाए । अर्का ओपनर कुशल भुर्तेल ४१ बलमा ३२ रन बनाउँदै क्याच भए । अर्का ब्याटर अमित श्रेष्ठले २८ रन बनाए ।
लुम्बिनीका लागि अनिल खरेलले सर्वाधिक २ विकेट लिए । दुर्गेश गुप्ताले १ विकेट लिए ।
पहिला ब्याटिङ गरेको लुम्बिनीले ४४.२ ओभरमा १८८ रनमा अल आउट भएको थियो । कप्तान देव खनालले सर्वाधिक ७४ रनको अर्धशतकीय पारी खेले । उनले ८८ बलमा ७ चौका र २ छक्का प्रहार गरे । तेस्रो क्रमका ब्याटर प्रज्वल थापाले २३ रन बनाए ।
पुलिसका लागि कप्तान दिपेन्द्र सिंहले सर्वाधिक ४ विकेट लिए । सागर ढकाल र करण केसीले समान २–२ विकेट लिए ।
