काठमाडौंः निलम्बित प्रधान न्यायाधीश चोलेन्द्र शम्शेर राणा आज सर्वोच्च अदालतमा हाजिर हुने तयारीका साथ बिहान करिब १० बजे सर्वोच्च अदालत पुग्नु हुने भएको छ ।
स्रोतका अनुसार राणाले सर्वोच्च अदालत प्रशासनलाई यस बारेमा हिजै शनिबार जानकारी गराइ सक्नु भएको छ, र आज बिहान उहाँ सर्वोच्च अदालत फर्कनु हुनेछ । राणा स्वयंले सर्वोच्चका कामु मुख्य रजिष्ट्रार नारायण पन्थीलाई फोन गरेर आफू नियमित काममा फर्कन लागेकाले आवश्यक तयारी गर्न निर्देशन दिएको स्रोतले बताएको छ ।
प्रतिनिधि सभाको महाभियोग सुनुवाई समितिले राणाका सम्बन्धमा प्रतिवेदन हिजो सभामुख अग्नि सापकोटालाई बुझाएको थियो जसमा राणा विरुद्ध महाभियोग लगाउन उपयुक्त हुने सुझाव दिएको थियो । तर प्रतिनिधि सभाको कार्यकाल हिजै समाप्त भएकाले महाभियोगका सम्बन्धमा संसदमा छलफल र मतदान हुन सकेन ।
महाभियोग लगाउने संसद र सांसद नै नरहेको अवस्थामा महाभियोग स्वतः निस्कृय हुने कतिपय कानुन व्यवसायीको जिकिर छ भने कतिपयले अर्को संसदले महाभियोगका विषयमा निर्णय गर्ने बताइरहेका छन् । आज आइतबारदेखि सर्वोच्च फर्कने तयारी भएसँगै सर्वोच्च प्रशासन, न्यायाधीशहरु र बारका पदाधिकारीबीच छलफल तिब्र भएका छन् ।
कानुनी प्रश्न बीच नै राणा आज सर्वोच्चमा हाजिर भएर नियमित काम गर्ने तयारी छ ।
कानुन मन्त्री गोबिन्द शर्माले निलम्बित प्रधान न्यायाधीश राणा सर्वोच्च फर्कन नसक्ने बताउनु भएको छ । कान्तिपुर दैनिकलाई दिएको अन्तर्वार्तामा मन्त्री शर्माले राणाको कदम सफल हुँदैन, महाभियोग लाग्ने आधार खुलाएर संसदीय समितिले प्रतिवेदन दिएको अवस्थामा जबरा काममा फर्कन मिल्दैन भन्नु भएको छ ।
नेपाल बार एसोसिएसनका पदाधिकारीहरु पनि जबरालाई सर्वोच्च प्रवेशमा रोक लगाउने मनस्थितिमा रहेका छन् ।
