काठमाडौँ । काठमाडौँ महानगरपालिकाको नगर प्रहरीले नयाँ बानेश्वर चोकको बानेश्वर कम्प्लेक्सको संरचना भत्काएको छ । बानेश्वर कम्प्लेक्सको अन्डर ग्राउन्ड पार्किङ खुलाउन नगर प्रहरीले संरचना भत्काएको हो ।
अन्डरग्राउन्ड पार्किङलाई छोपेर पसल सञ्चालन भइरहेको सो व्यापारिक भवनमा पार्किङ खुलाउन महानगर प्रमुख बालेन्द्र साह आफैँ खटिएका थिए । नगर प्रहरीले मेसिन प्रयोग गरी संरचना भत्काएको हो ।
काठमाडौँ महानगरपालिकाले अन्डर ग्राउन्ड पार्किङलाई अन्य प्रयोजनामा नलगाउन आग्रह गर्दै ३५ दिने सूचना जारी गरेको थियो । व्यापारीहरुलाई दिइएको सो म्याद आइतबार सकिएको हो ।
काठमाडौँमा धेरै व्यापारिक भवनहरुले अन्डरग्राउन्ड पार्किङ बनाए पनि तिनीहरुलाई पसलका रुपमा चलाउनाले मुख्य सहरी क्षेत्रमा फुटपाथमै पार्किङ भइराखेका छन् । नयाँ बानेश्वरमा मात्रै महानगरपालिकासँग अन्डरग्राउन्ड पार्किङको अनुमति मागेर २२ वटा व्यापारिक भवन बनेका छन् । तर प्राय सबैले अन्डर ग्राउन्ड पार्किङलाई पसल सञ्चालन गर्नका लागि भाडामा दिएको पाइएको नगर प्रहरीले जनाएको छ ।
