काठमाडौँ । धादिङको धुनिबेँसीस्थित बन्चरेडाँडामा बनिरहेको डम्पिङ साइटमा काठमाडौँ उपत्यकाको फोहोर विसर्जन गर्न थालिएको छ ।
स्थानीयवासीको विरोधका बाबजुद प्रहरीको सुरक्षामा बन्चरेडाँडामा फोहोर विसर्जन गर्न थालिएको हो । स्थानीयवासीले भने आफूहरुसँग समन्वय नगरेको र आफ्ना माग सम्बोधन नगरी फोहोर विसर्जन गर्न सुरु गरेको बताएका छन् । बन्चरेडाँडामा फोहोर नफ्याल्न भन्दै आन्दोलित स्थानीयवासीको नेतृत्व गरेका त्यहाँका वडाध्यक्ष मानबहादुर तामाङलाई प्रहरीले पक्राउ गरी हिरासतमा राखेको छ ।
काठमाडौँ महानगरपालिका वातावरण विभागका अनुसार मंगलबार बिहान ९० वटा गाडीले बन्चरेडाँडामा बनिरहेको डम्पिङ साइटको सेल–१ मा फोहोर विसर्जन गरिएको हो ।
बन्चरेडाँडामा रहेको सो ल्यान्डफिट साइट सहरी विकास मन्त्रालयले बनाएको हो र यो साइटमा पहिलोपटक फोहोर विसर्जन गरिएको हो । काठमाडौँ महानगरपालिकाले सहरी विकासमन्त्री रामकुमारी झाँक्रीको समन्वयमा बन्चरेडाँडामा फोहोर विसर्जन सुरु भएको बताएको छ ।
हालकै अवस्थामा फोहोर विसर्जन गर्न नहुनेभन्दा स्थानीयवासीले विभिन्न माग राखेका थिए । यद्यपि सोमबार गृहमन्त्रालयमा बसेको सरोकारवालाको बैठकले बल प्रयोग गरेर भए पनि बन्चरेडाँडामा फोहोर विसर्जन गर्ने निर्णय गरेको थियो ।
सिसडोलमा रहेको ल्यान्डफिल साइटमा फोहोरले भरिएपछि काठमाडौँ उपत्यकाको फोहोर विसर्जन हुन सकेको थिएन । त्यसैले विगत केही दिनदेखि काठमाडौँका गल्ली र सडकहरुमा फोहोर डुङ्गुर देखिन्थ्यो ।
सिसडोल हुँदै बन्चरेडाँडा पुग्नुपर्छ । सो बाटो अझै राम्ररी तयार नभएकाले तत्कालका लागि ग्राभेल गरेर फोहोर विसर्जन सुरु गरिएको छ ।
