काठमाडौँ । यौनिक अल्पसंख्यकको अधिकारका लागि सक्रिय अभियानकर्मी भूमिका श्रेष्ठलाई अमेरिकी सरकारले अन्तर्राष्ट्रिय साहसी महिला अवार्डबाट सम्मान गरेको छ ।
२०७८ चैत्र १ गते भर्चुअल रुपमा भएको कार्यक्रममा अमेरिकी विदेशमन्त्री एन्थोनी ब्लिंकेन र प्रथम महिला जिल बाइडेनले श्रेष्ठलाई सम्मानित गर्नुभएको हो ।
शुक्रबार एक समारोहका बीच नागरिक सुरक्षा, लोकतन्त्र तथा मानव अधिकार सम्बन्धी अमेरिकी उपविदेशमन्त्री उजरा जेयाले अमेरिकी विदेश मन्त्रालयद्वारा प्रदान गरिने अन्तराष्ट्रिय साहसी महिला पुरस्कार अभियन्ता श्रेष्ठलाई हस्तान्तरण गर्नुभयो।
सो अवसरमा विदेशमन्त्री जेयाले भूमिकाले हासिल गर्नुभएका उपलब्धीहरूको कदर गर्नुहुँदै मानव अधिकार र लोकतन्त्रको उत्थानमा वहाँको निरन्तर वकालतको प्रशंसा गर्नुभएको थियो।
अन्तरराष्ट्रिय साहसी महिला पुरस्कारमा नेपाली अभियन्ता भूमिका श्रेष्ठ लगायत संसारभरका १२ जना साहसी लाई सम्मान गरिएको थियो । श्रेष्ठलाई एजीबीटीक्यूआई समुदायको हक अधिकारको लागि गर्नुभएको अथक मेहेनतका लागि अमेरिकी विदेश मन्त्रालयले अन्तर्राष्ट्रिय साहसी महिला पुरस्कारबाट सम्मानित गरेको हो ।
अमेरिकी विदेश मन्त्रालयले हरेक वर्ष प्रदान गर्ने यो पुरस्कार आफ्नो जीवन नै जोखिममा राखेर आफ्नो समुदायमा सकारात्मक परिवर्तन ल्याउनका लागि उल्लेखनीय साहर, आँट र नेतृत्व को प्रदर्शन गर्नुहुने महिलाहरूलाई प्रदान गरिन्छ। नेपालले यो पुरस्कार लगातार दोश्रो वर्ष जित्न सफल भएको हो।
यस अघि सन् २०२१ मा तेजाब आक्रमणबाट घाइते भएकी मुस्कान खातुनले पनि अन्तर्राष्ट्रिय साहसी महिला अवार्ड पाउनु भएको थियो ।
