काठमाडौंः स्थानीय तह निर्वाचनको मतगणनाका प्रारम्भिक विवरणहरु प्राप्त हुन थालेका छन् । यी विवरणले खासगरी नेकपा एमाले र पाँच दलीय गठबन्धनबीच मुख्य प्रतिस्पर्धा रहेको देखाएका छन् ।
हालसम्म मतगणना सकिएका मनाङ र मुस्ताङका तीनवटा गाउँपालिकामध्ये एमालेले दुई वटामा जितेर अग्रता लिएको छ । मनाङको चामे र मुस्ताङको लोघेकर दामोदरकुण्ड गाउँपालिकामा एमालेले जितेको छ ।
नेपाली कांग्रेसले मनाङको नार्पाभूमि गाउँपालिकामा बिजय हासिल गरेको छ ।
मतगणना जारी
मतगणना शुरु भएको एकमात्र उपमहानगरपालिका बुटवलमा गठबन्धनले अग्रता लिएको छ । महानगरपालिका र अन्य उपमहानगरपालिकामा गणना शुरु भएको छैन ।
धुलिखेल र जनकपुर नगरपालिकामा कांग्रेसका बागी उम्मेदवारले अग्रता लिइरहेका छन् भने बनेपा, सूर्यबिनायक, दमक, उर्लाबारी लगायतका नगरपालिकामा एमालेले अग्रता लिएको छ ।
प्रधानमन्त्री शेरबहादुर देउवाको गृहजल्ला अमरगढी र गन्यापधुरामा कांग्रेसले अग्रता लिएको छ ।
गोरखा नगरपालिका वडा नम्बर १ मा नेपाली कांग्रेस बिजयी
गोरखा । गोरखा नगरपालिका वडा नम्बर १ मा नेपाली कांग्रेस बिजयी भएको छ । वडा अध्यक्ष हिक्मतबहादुर कुँवर ४९२ मत प्राप्त गर्दे बिजयी भएका हुन् । उहाँका निकटतम प्रतिद्वन्द्वी माओवादी केन्द्रका उम्मेदवारले ३७१ मत ल्याएका छन् ।
यस्तै मेयर उप मेयरमा नेपाली कांग्रेसको अग्रता छ । मेयरमा कांग्रेसको ४८३, उप मेयरमा ४९५ मत रहेको छ ।
मेयरमा माओवादी केन्द्रको ३८६, उप मेयरमा जसपाको २७३, एमालेको मेयरमा २५४ र उप मेयरमा २२७ मत रहेको छ ।
म्याग्देमा एमालेको अग्रता
तनहुँ । तनहुँको म्याग्दे गाउँपालिकाको प्रारम्भिक मतगणनामा नेकपा एमालेले अग्रता बनाएको छ ।
६७९ मतगणना हुँदा एमालेका श्रीप्रसाद श्रेष्ठले ३२१, नेपाली कांग्रेसकी मायादेवी रानाले २३७ र माओवादी केन्द्रका दिलीप श्रेष्ठले ४५ मत प्राप्त गरेका छन् ।
यस्तै, उपाध्यक्षमा कांग्रेसका बालकृष्ण घिमिरेले २८४, एमालेकी रत्ना घिमिरेले २६१ र माओवादीका दुर्गा थापाले ३७ मत प्राप्त गरेका छन् ।
नुवाकोटको म्यागङ–१ मा कांग्रेसको प्यानल विजयी
नुवाकोट । नुवाकोटको म्यागङ गाँउपालिका वडा नं १ मा नेपाली कांग्रेसको प्यानल विजयी भएको छ । यही वैशाख ३० मा भएको स्थानीय तह निर्वाचनमा अन्तर्गत सो वडा को वडाध्यक्ष पदमा जिमाबहादुर तामाङ ९४ मत ल्याएर विजयी हुनुभएको निर्वाचन अधिकृतले सूर्यदर्शन पण्डितले जानकारी दिनुभयो ।
उहाँका अनुसार नवनिर्वाचित तामाङको निकटतम् प्रतिस्पर्धी नेकपा (माओवादी केन्द्र)का अनिलकुमार घलेले ६९ मत प्राप्त गर्नुभएको छ । वडाध्यक्षसहित महिला सदस्य, दलित महिला सदस्य र दुई खुला सदस्य गरेर वडाको पाँच जना पदाधिकारी नै कांग्रेसका उम्मेदवार विजयी भएका छन् ।
उक्त वडाबाट गाउँपालिकाको अध्यक्षमा कांग्रेसका उम्मेदवारलाई ९३ , माओवादीका उम्मेदवारलाई ६९, नेकपा ९एमाले०को उम्मेदवारलाई ३७ मत प्राप्त भएको थियो । अहिले सोही गाउँपालिकाको वडा नं २ को मतगणना जारी छ ।
