चितवन । भरतपुर महानगरपालिकामा पाँचदलीय गठबन्धनका तर्फबाट नेकपा माओवादी केन्द्रका उम्मेदवार रेनु दाहालले पाँच वर्ष अघि नेपाली कांग्रेस र माओवादी केन्द्रको गठबन्धनबाट उम्मेदवार भई विजयी हुँदा गरेका प्रतिबद्धता धेरै पूरा गरेको बताउनुभएको छ ।
भरतपुरमा बिहीबार सुरु भएको पाँच दलीय गठबन्धनको चुनावी सभामा उहाँले पछिल्लो पाँच वर्षमा जनता र प्रतिपक्षीको अगाडि आँखामा आँखा जुधाएर गर्व गर्न लायक काम गरेको दावी गर्नुभयो ।
यो बीचमा विकासका थुप्रै काम अगाडि बढाएको, विकास र पूर्वाधारको क्षेत्रमा स्मार्ट सिटीका रुपमा गुरुयोजना बनाएको र त्यही गुरुयोजनाअनुसार आवश्यक पूर्वाधार र योजना तयार गरेर अगाडि बढेको बताउनुभयो ।
उहाँले भोलिका दिनमा पनि गठबन्धनको साझा उम्मेदवारका रुपमा अगाडि बढ्ने र बाँकी रहेका विकास र पूर्वाधारका कामलाई अगाडि बढाउने प्रतिबद्धता व्यक्त गर्नुभयो ।
