एजेन्सी । लगातार पाँच हारपछि कोलकाता नाइट राइडर्सले फेरि जितको स्वाद चाखेको छ । राजस्थानलाई ७ विकेटले हराउँदै कोलकाताले सिजनको चौथो जित दर्तासहित अघिल्लो हारको बदला लिएको हो ।
यस सिजनको पहिलो खेलमा राजस्थानले कोलकातालाई ७ रनले हराएको थियो भने यस पटक नाइट राइडर्सले जित दर्ता गर्दै अंक बराबरी गरेको छ ।
श्रेयस अय्यरको नेतृत्वमा रहेको केकेआरले राजस्थानले दिएको १५३ रनको लक्ष्य तीन विकेटको क्षतिमा पाँच बल बाँकी रहँदै पछ्यायो । केकेआर अब अंक तालिकाको सातौं स्थानमा पुगेको छ । कोलकाताका लागि नितिश राना र रिंकु सिंहले खेल जित्ने इनिङ्स खेल्दै चौथो विकेटका लागि ३८ बलमा ६६ रनको साझेदारी गरे । नितिशले ३७ बलमा ४८ रनमा अविजित रहे भने रिंकु सिंहले २३ बलमा ४२ रन बनाए ।
राजस्थानले दिएको १५३ रनको लक्ष्य पछ्याएको केकेआरको सुरुवात खराब रह्यो । नयाँ ओपनिङ जोडी भए पनि टोलीले राम्रो सुरुवात गर्न सकेन । आरोन फिन्च र बाबा इन्दरजित पहिलो पावरप्लेमा नै पेभिलियन फर्किए । फिन्चले चार र इन्दरजीतले १५ रन बनाए । कप्तान श्रेयस अय्यरले नितिश राणासँग मिलेर तेस्रो विकेटका लागि ६० रनको महत्वपूर्ण साझेदारी गरे । तर श्रेयस ठूलो इनिङ्स खेल्न असफल भए र १३ औं ओभरमा ३४ रन बनाएर आउट भए । उनलाई बोल्टले आउट पारे ।
त्यसपछि नितिश राणाले इनिङ्सलाई अगाडि बढाए र रिन्कु सिंहसँग चौथो विकेटका लागि महत्वपूर्ण साझेदारी गरे । दुवैले ३८ बलमा ६६ रनको अटूट साझेदारी गर्दै टोलीलाई जित दिलाए ।
यसअघि मुम्बईको वानखेडे स्टेडियममा कोलकाताले टस जितेर राजस्थानलाई पहिले ब्याटिङको निम्तो दिएको थियो । राजस्थानको सुरुवात राम्रो हुन सकेन र तेस्रो ओभरमा मात्र दुई रन बनाएर देवदत्त पडिक्कल आउट भए । त्यसपछि जोस बटलर र सञ्जु सामसनले इनिङ्सलाई एकसाथ सम्हाल्दै दोस्रो विकेटका लागि ४८ रन जोडे । तर, यसपटक बटलरले ठूलो इनिङ खेल्न सकेनन् र २५ बलमा २२ रन बनाएर आउट भए ।
त्यसपछि सञ्जु सामसनले करुण नायर र रियान परागसँग सानो साझेदारी गरे तर टोलीको रनरेट निकै कम थियो । यो अवधिमा सामसनले ३८ बलमा आफ्नो अर्धशतक पूरा गरे । उनी १८ औं ओभरमा ४९ बलमा ५४ रन बनाएर आउट भए ।
त्यसपछि अन्तिम ओभरमा शिमरोन हेटमायरले द्रुत रन बनाए र टोलीको स्कोर १५० भन्दा माथि पुर्याए । हेटमायर १३ बलमा २७ रनमा अविजित रहे । कोलकाताका लागि टिम साउथीले दुई विकेट लिए ।
