काठमाडौँ । बिहीबार दुबईबाट काठमाडौँ आएको हिमालय एयरलाइन्सको विमानको शौचालयमा राखिएको डस्टबिनमा दुई केजीभन्दा बढी सुन फेला परेको छ ।
प्रहरीले शौचालयको डस्टबिनमा दुई केजी २३२ ग्राम सुन फेला पारेपछि विमानमा कार्यरत सरसफाइ कर्मचारीसहित पाँच जनालाई पक्राउ गरेको छ ।
बिहीबार पाँचथर घर भएका मीनकुमार माबो र नुवाकोट घर भएका सुमन तामाङले दुबईबाट सुन ल्याएको प्रहरीले जनाएको छ । उनीहरुले सो सुन शौचालयको डस्टबिनमा छोडेर हिँडेका थिए । पछि सफाइ कर्मचारीले सुन निकालेर कर्मचारी निस्कने गेटतर्फबाट निस्कँदै गर्दा प्रहरीले पक्राउ गरेको छ ।
पक्राउ पर्नेमा उदयपुरका २८ वर्षीय राजेश राई, दोलखा गौरीशङ्करका ४१ वर्षीय ट्याक्सी चालक हेमबहादुर थापा र सुनगाभा सप्लायर्स एण्ड सरसफाइ प्रालिका सुपरभाइजर सप्तरी घर भएका ताराकान्त चौधरी छन् ।
त्रिभुवन अन्तर्राष्ट्रिय विमानस्थलमा विमानको शौचालय प्रयोग गरेर पनि सुन तस्करी हुने गरेको यस घटनाले देखाएको छ ।
