काठमाडौँ । नेपालस्थित पाकिस्तानी दूतावासले आजदेखि सातौँ संस्करणको नेपाल–पाकिस्तान मैत्री टी–२० क्रिकेट प्रतियोगिता २०२२ आयोजना गरेको छ । नौ दिनसम्म चल्ने प्रतियोगितामा १२ क्रिकेट टोलीको सहभागिता रहने दूतावासले आज एक विज्ञप्ति जारी जनाएको छ ।
कार्यक्रम नेपाली च्यानल ‘एक्शन स्पोर्ट्स’ मा प्रत्यक्ष प्रसारण गरिनेछ। खेलको उद्घाटन कार्यक्रममा काठमाडौँ महानगरपालिकाका प्रमुख विद्यासुन्दर शाक्यले यस्ता खेलकुद गतिविधिहरू आयोजना गर्न दूतावासको पहलको प्रशंसा गर्दै दुई देशका युवालाई एकजुट बनाउन क्रिकेट र खेलकुदको सम्भावना रहेको बताए ।
नेपालस्थित पाकिस्तानका राजदूत सैयद हैदर शाहले कोभिडको यस समयमा खेलकुद र बाहिरी गतिविधिको महत्व झनै बढेको बताए । उनले नेपालमा क्रिकेटको बढ्दो लोकप्रियताले आईसीसीको सदस्यता प्राप्त गर्न धेरै टाढा नहुने सङ्केत गरेको उल्लेख गर्दै नेपालको क्रिकेट सपना साकार पार्न पाकिस्तान सहयोग गर्न इच्छुक रहेको बताए ।
