काठमाडौँ । नेपाल राष्ट्र बैंकका गभर्नर महाप्रसाद अधिकारी काममा फर्किएका छन् । मङ्गलबार सर्वोच्च अदालतले गभर्नरलाई निलम्बन गर्ने निर्णयलाई तत्काल कार्यान्वयन नगर्न नगराउन भन्दै अन्तरिम आदेश दिएपछि गभर्नर अधिकारी काममा फर्किएका हुन् ।
सर्वोच्चको आदेशसँगै बुधबार काममा फर्किएका उनले सर्वोच्चको आदेश आफ्नो पक्षमा नभएर सिस्टम (प्रणाली) को पक्षमा आएको बताए ।
उनका अनुसार आफू एउटा माध्यम मात्र भएको र आदेश सिस्टमका लागि आएको हो । “यहाँहरु सबैले मेरा लागि भन्दा पनि सिस्टमका लागि बोलिदिनुभएको छ, त्यसका लागि कृतज्ञ छु, अब म आफ्नो जिम्मेबारीमा फर्किएको छु”, बुधबार राष्ट्र बैंकको केन्द्रीय कार्यालय बालुवाटारमा कर्मचारीहरुले स्वागत गर्दा उनले भने ।
गत चैत २४ गते मन्त्रिपरिषद् बैठकले गभर्नर अधिकारीलाई निलम्बन गरेको थियो । सरकारको निर्णयविरुद्ध उनले यही वैशाख ४ गते आइतबार सर्वोच्च अदालतमा रिट निवेदन दिएका थिए ।
अदालतले अधिकारीको निलम्बनको विषयमा छलफल गर्न यही वैशाख १३ गते दुवै पक्षलाई बोलाएको छ ।
