काठमाडौं । जापान सरकारले ६ एम्बुलेन्स नेपाललाई सहयोग गरेको छ । जापानका राजदूत किकुता युताकाले स्वास्थ्य तथा जनसङ्ख्या राज्यमन्त्री उमेश श्रेष्ठलाई एक कार्यक्रममा एम्बुलेन्स हस्तान्तरण गरेके हो ।
राज्यमन्त्री श्रेष्ठले जापान सरकारले स्वास्थ्य क्षेत्रमा सहयोग गर्दै आएकामा धन्यवाद दिनुभयो । उहाँले कोभिड–१९ को रोकथाम र नियन्त्रण गर्न जापान सरकारले गरेको सहयोगमा प्रशंसा गर्नुभयो । उहाँले नेपाल र जापानबीच निरन्तर सहयोग आदानप्रदान हुनुपर्ने विश्वास व्यक्त गर्नुभयो।
नेपालस्थित जापानका राजदूत किकुता युताकाले नेपाललाई सबै क्षेत्रमा जापानले सहयोग गर्दै आइरहेको बताउनुभयो । उक्त एम्बुलेन्स मन्त्रालयले नेपाल एम्बुलेन्स सेवालाई आजै प्रदान गरेको छ । एम्बुलेन्स सेवाका अध्यक्ष डा. प्रदीप वैद्यले प्राप्त एम्बुलेन्सले बिरामीलाई सेवा प्रदान गर्ने बताउनुभयो । उहाँका अनुसार एम्बुलेन्समा एक जना इमर्जेन्सी मेडिकल टेक्निसियन (इएमटी) सहितको प्राथमिक स्वास्थ्य उपचार समेत गरिने छ ।
“एम्बुलेन्समा राखेर अस्पतालसम्म लैजाँदा बिरामीलाई केही समस्या पर्नसक्ने भएकाले हामीले एक जना इएमटी हुन्छन्”, अध्यक्ष वैद्यले भन्नुभयो, “ती इएमटीले बाटोमा बिरामीलाई केही समस्या परे भने उपचार गर्दछन् ।”
एम्बुलेन्समा भेन्टिलेटर, अक्सिजनलगायत स्वास्थ्य सामग्रीसहितको तीन महिना तालिम प्राप्त एक जान इएमटी रहने छ । अध्यक्ष डा. वैद्यले अस्पतालसम्म लैजाँदा बिरामीलाई केही समस्या परेमा सामान्य उपचार गर्ने प्राविधिकसमेत एम्बुलेन्समा राखिने जानकारी दिनुभयो ।
