काठमाडौँ । टिपरको ठक्करले स्कुल जाँदै गरेका दुई बालिकाको मृत्यु भएपछि काठमाडौँको सुन्दरीजल क्षेत्र तनावग्रस्त बनेको छ । आज बिहान गोकर्णेश्वर नगरपालिका–१ को मेलम्ची चोकमा बा ४ ख ६९६५ नम्बरको खाली टिपरको ठक्करबाट बाबुले चलाएको मोटरसाइकलमा सवार दुई बालिकाको मृत्यु भएको हो ।
बाबु रोहन घिसिङ घाइते भएका छन् भने उनका दुई छोरी सृष्टि र श्रेयाको मृत्यु भएको प्रहरीले जनाएको छ । उनीहरु वल्र्ड युथ इन्टरनेसनल स्कुलमा पढ्थे। बालिकाको मृत्यु भएपछि आक्रोशित स्थानीय समुदायले टिपरमा ढुङ्गामुढा गर्दै टिपरमा आगजनीसमेत गरेका थिए । अहिले सो क्षेत्रमा प्रहरीको बाक्लो उपस्थिति रहेको छ ।
प्रहरीले स्थानीय समुदायमाथि अश्रुग्याससमेत प्रहार गरेको छ । स्थानीय समुदायका अनुसार टिपरले ब्याक गरेको बताएका छन् । घाइते घिसिङको नेपाल मेडिकल कलेज अत्तरखेलमा उपचार भइरहेको छ ।
