काठमाडौं । त्रिकोणात्मक टी–ट्वान्टी अन्तर्राष्ट्रिय सिरिज अन्तर्गत घरेलु टोली नेपालले आज (बुधबार) पाहुना टोली मलेसियासँग प्रतिस्पर्धा गर्दैछ ।
नेपाल र मलेसियाबीचको खेल कीर्तिपुरस्थित त्रिवि क्रिकेट मैदानमा १२ः३० मा सुरु हुनेछ ।
दुबै टोलीले पहिलो खेल जितसँगै सिरिजको सुखद सुरुवात गरिसकेका छन् । दुई टोलीले पपुवा न्युगिनी (पीएनजी) लाई पराजित गरेका हुन् ।
नेपालले पहिलो खेलमा पपुवा न्युगिनीलाई १५ रनले पराजित गरेको थियो भने मलेसियाले पपुवा न्युगिनीलाई ८ रनले हराएको थियो ।
यसअघि नेपाल र मलेसिया ६ पटक टी–ट्वान्टी अन्तर्राष्ट्रियमा आमनेसामने भएका छन् । मलेसियाविरुद्ध नेपाल हाबी हुँदै आएको छ । ५ खेल नेपालले आफ्नो पक्षमा पार्दा मलेसियाले नेपाललाई एक पटक मात्र हराएको छ ।
नेपालले बिहीबार पिएनजीसँग खेल्नेछ । यस्तै, शनिबार पुनः मलेसियाविरुद्ध खेल्नेछ । शीर्ष दुई टोलीले अप्रिल ४ मा फाइनल खेल्नेछन् ।
नेपाली टोलीः
सन्दीप लामिछाने (कप्तान), आरिफ शेख, कुशल भुर्तेल, सोमपाल कामी, दीपेन्द्रसिंह ऐरी, सागर ढकाल, कमलसिंह ऐरी, आसिफ शेख, करण केसी, अभिनाश बोहरा, विवेक यादव, दीलिप नाथ, लोकेश बम, कुशल मल्ल, रोहित पौडेल र आदिल अन्सारी ।
