काठमाडौं । ठमेल पर्यटन विकास परिषद्ले रसुवाका बाढीपीडितलाई राहत सामग्री सहयोग गरेको छ ।
परिषद्ले यही भदौ १० गते भोटेकोशी र त्रिशूली नदीमा आएको बाढीका कारण प्रत्यक्ष मारमा परेका उत्तरगया गाउँपालिका–१ र २ का बासिन्दालाई आज खाद्यान्न, लत्ताकपडा र अन्य दैनिक उपभोग्य सामाग्री सहयोग गरेको हो ।
परिषद्का अध्यक्ष राजुमान डङ्गोलको नेतृत्वमा गएको टोलीले उत्तरगया गाउँपालिका–१ र २ का १२० घरधुरीलाई स्थानीय सरकारको समन्वयमा उक्त राहत सामग्री वितरण गरेको हो । अध्यक्ष डङ्गोलले प्रभावित परिवारलाई तत्कालको गर्जो टार्न सहयोग पुगोस् भन्ने उद्देश्यले राहत वितरण गरिएको बताउनुभयो ।
परिषद्ले १२५ बोरा चामल, १५० किलोग्राम दाल, १०० लिटर तेल, १७५ किलोग्राम नुन, ५० किलोग्राम सोयाबिन, ७५ किलोग्राम चिउरा सहयोग गरेको छ । यस्तै, खाद्यान्नमा चाउचाउ, बिस्कुट तथा जुस सहयोग गरेको हो । यसैगरी, लत्ताकपडामा ३७० थान तयारी पोसाक (टिसर्ट, पाइन्ट, ज्याकेट, साडी), २०० जोर जुत्ता र २०० जोर चप्पल, ५२ थान सिरक, १६ थान डसना, २० थान ब्ल्याङ्केट र ८५ थान सिरानी सहयोग गरेको परिषद्का महासचिव पशुपति कँडेलले जानकारी दिनुभयो ।
यस्तै, भान्छाका सामाग्रीमा १०० थान थाल, १०० थान गिलास, प्रेसर कुकर, कराई र चम्चा रहेका छन् भने स्वास्थ्य तथा सरसफाइका सामग्रीमा जीवनजल, औषधि, ब्यान्डेज, स्यानिटरी प्याड र ट्वाइलेट पेपर रहेको छ ।
पर्यटन क्षेत्रको अग्रणी संस्था ठमेल पर्यटन विकास परिषद्ले आफ्नो सामाजिक उत्तरदायित्वअन्तर्गत प्राकृतिक विपत्तिको समयमा सधैँ सहयोग गर्दै आएको र यसपटक पनि रसुवाका पीडितको घाउमा मलम लगाउने प्रयास गरेको जनाएको छ ।
