काठमाडौँ — पार्टीको नेतृत्व लिन उम्मेदवारीको रस्साकसी चलिरहेका बेला कांग्रेसका पूर्वमहामन्त्री प्रकाशमान सिंह सुटुक्क भारत पुगेका छन् । स्रोतका अनुसार सिंह भारतीय जनता पार्टीका अध्यक्ष जगतप्रकाश नाड्डालाई भेट्न बिहीबार नेपालगन्जको बाटो हुँदै नयॉ दिल्ली गएका हुन् । उनले नयॉ दिल्लीमा को—कोलाई भेटे भन्नेबारे भने जानकारी हुन सकेको छैन ।
बर्दियामा बुधबार गणेशमान सिंहको सालिक अनावरणपछि उनी त्यतैबाट नयॉ दिल्ली हानिएका थिए । सिंह शनिबार नै नेपाल फर्कंदैछन् ।
सभापतिसमेत रहेका प्रधानमन्त्री शेरबहादुर देउवासँग संस्थापनइतर खेमाबाट वरिष्ठ नेता रामचन्द्र पौडेल, महामन्त्री शशांक कोइराला, सिंह र नेता शेखर कोइराला मुख्य प्रतिस्पर्धामा छन् । देउवासँग प्रतिस्पर्धाका लागि इतरपक्षबाट एकजना मात्रै उम्मेदवार तय गर्न दबाव बढिरहेका बेला सिंहको भारत भ्रमणलाई नेताहरुले अर्थपूर्ण रुपमा लिएका छन् । केही दिनअघि महामन्त्री शशांक कोइराला पनि भारत गएका थिए । भारतमा उपचारत दुई सांसद प्रदीप गिरी र कर्मा घलेलाई भेट्न भनी भारत पुगेका कोइरालाले भारतीय जनता पार्टीका विदेश विभाग प्रमुख विजय चौथाइवालेसहितका भाजपा नेताहरुलाई भेटका थिए ।
त्यसपछि सिंह भारत गएका हुन् । केही दिनअघि मन्त्रिपरिषद् विस्तारलाई लिएर आफ्नै खेमाका वरिष्ठ नेता रामचन्द्र पौडेलसँग असन्तुष्टि बढेको थियो ।
सिंहले सांसद राजेन्द्र केसीलाई मन्त्री बनाउन चाहेका थिए । पौडेल र महामन्त्री कोइरालाको प्रस्तावमा दिलेन्द्र बडु र मिनेन्द्र रिजाल मन्त्री भएपछि सिंह पौडेलसँग आक्रोशित छन् । पछिल्लो पटक उनले बोलाएको बैठकमा समेत जान छोडेका छन् । शुक्रबार भने भारतमा भएकाले पौडेलले बोलाएको बैठकमा सिंहको अनुपस्थित रहेको हो । ( कान्तिपुर दैनिकमा समाचार छ)
