तनहुँ । नेकपा एमालेको आसन्न दशौं महाधिवेशनका लागि तनहुँबाट छनोट हुने प्रतिनिधिको टुंगो लागेको छ ।
शनिबारको भेलाबाट महिला, दलितसहित गरी १३ जना प्रतिनिधि सर्वसम्मतिले छनोट गरिएको हो ।
प्रतिनिधि बन्न ४३ जनाको उम्मेदवारी परेको थियो । दुई निर्वाचन क्षेत्र रहेको तनहुँमा क्षेत्र नं. १ बाट पाँच जना र क्षेत्र नं. २ बाट आठ प्रतिनिधि छनोट गरिएको छ ।
जसमध्ये क्षेत्र नं. १ बाट खुलातर्फ इन्द्रबहादुर कुँवर, हरिराज कँडेल, बाबुराम अधिकारी, कलावती ढकाल चयन भएका छन् भने महिलातर्फ राष्ट्रिय सभा सदस्य भगवती न्यौपाने चयन भएकी छन् ।
यस्तै क्षेत्र नं. २ बाट खुलातर्फ प्रतिनिधिसभा सदस्य एवं जिल्ला अध्यक्ष केदार सिग्देल, रामचन्द्र उपाध्याय, धर्मराज खनाल, विष्णुभक्त सिग्देल र श्रीप्रसाद श्रेष्ठ चयन भएका छन् । महिलातर्फ सविता रसाइली र राधा महत चयन भए भने दलिततर्फबाट बाबुराम सुनार चयन भए ।
एमालेले महाधिवेशनका लागि एक हजार ९९९ प्रतिनिधि चयन गर्दैछ ।
एमाले महाधिवेशन यही मङ्सिर १० देखि १२ गतेसम्म चितवनमा हुँदैछ । विधान महाधिवेशन सकाएको एमालेले अबको महाधिवशेनमा नेतृत्व चयन गर्नेछ ।
पदाधिकारीसहित २२५ जनाको केन्द्रीय कमिटी र अनुशासन आयोग तथा लेखा आयोग गरी १५/१५ जना निर्वाचित हुनेछन् ।
एमालेले यसपटकको महाधिवेशनमा विद्युतीय मेसिनबाट मतदान गर्ने तयारी गरेको छ ।
