काठमाडौँ। भोटेकोशी बाढीमा परी २ सय ३३ जना यातायात मजदुर बेपत्ता भएका छन् ।
गत भदौ १० गते गएको भोटेकोशी बाढीमा परी यातायात क्षेत्रमा अपूरणीय मानवीय तथा भौतिक क्षति पुगेको नेपाल यातायात व्यवसायी राष्ट्रिय महासंघले जनाएको हो ।
महासंघकाअनुसार हालसम्म प्राप्त विवरणानुसार २ सय ३३ जना चालक तथा सहचालक बेपत्ता भएका छन् भने करिव ९ सय वटा सवारी साधनमा क्षति पुगेको छ ।
भदौ १० गतेको भोटेकोशी बाढीमा परी ज्यान गुमाउनेहरूको स्मरणमा जडिबुटीमा आयोजित स्मृति सभामा बोल्दै महासंघका अध्यक्ष पुण्यप्रसाद सिटौलाले यातायात क्षेत्रले बेहोर्नुपरेको भयावह क्षतिको विवरण सार्वजनिक गर्नुभएको हो ।
नेपाल अरनिको यातायात प्रा.लि. १८ वटा बस, १ मिनी ट्रक, २ जिप र ४ वटा कन्टेनर पूर्ण रूपमा ध्वस्त भएका छन् । यस कम्पनीका ५० भन्दा बढी मजदुर तथा स्वरोजगार व्यवसायी हराइरहेका छन् ।
नमस्ते पासाङ ल्हामु यातायात प्रा.लि. १८ वटा बस र २१ जना कर्मचारी बेपत्ता छन् । नारायणी यातायात व्यवसायी प्रा.लि.५९ वटा ट्रक तथा कन्टेनर र ७० जना मजदुर बेपत्ता छन् ।
नेपाल टिपर तथा ट्रक व्यवसायी समिति (कलंकी) का ७ वटा टिपर, २२ कन्टेनर, २३ ट्रक र १ ट्रेलरसहित ४० जना कर्मचारी सम्पर्कविहीन छन् ।
हिमालयन यातायात प्रालि का ४ ट्रक, १६ कन्टेनर, १ सुमो र ७ वटा टिपरका साथै १० जना चालक÷सहचालक बेपत्ता छन् । भक्तपुर न्यू भिजनका ६ सवारी र २ मजदुर, नेपाल माइक्रो कम्पनीका ९ माइक्रोबस र ९ मजदुर, पृथ्वी राजमार्ग कम्पनीको १ बस र २२ यात्रीसहित चालक, धादिङ मण्डली र धादिङ ग्रामीण यातायातका सवारी साधन र मजदुरहरू हराइरहेका छन् ।
महासंघकाअनुसार १९१ वटा सवारी साधन हराएको पुष्टि भइसकेको छ भने करिव ३ सय बस, १ सय माइक्रो÷मिनीबस र ४ सय ट्रक तथा कन्टेनर गरी कुल ९ सय को हाराहारीमा सवारी साधनमा क्षति पुगेको प्रारम्भिक अनुमान छ ।
महासंघले विपद्को यस घडीमा सरकारसँग विशेष राहत र सहयोगको माग गरेको छ । अध्यक्ष सिटौलाले बाढीमा बगेका र बेपत्ता भएका सवारी साधनको बैंक तथा वित्तीय संस्थाको किस्ता तत्काल रोक्का गर्न सरकारसँग माग गर्नुभयो ।
उहाँले भन्नुभयो, ‘भोलिदेखि नै बैंकहरूले ताकेता गर्ने अवस्था आउन सक्छ, त्यसैले ती सवारीको किस्ता अहिलेलाई स्थगित गरी उचित क्षतिपूर्ति र बिमा भुक्तानीको व्यवस्था मिलाउनुपर्छ ।’
ज्यान गुमाएका र बेपत्ता भएका चालक तथा मजदुरका परिवारलाई उचित क्षतिपूर्ति दिन र घाइतेहरूको उपचारको व्यवस्था गर्न महासंघले आग्रह गरेको छ । यातायात व्यवसायीहरूले ठूलो क्षति व्यहोरेर पनि सरकारको उद्धार कार्यमा हातेमालो गरिरहेको बताएका छन् ।
कलंकीस्थित टिपर व्यवसायी संघले विभिन्न क्षेत्रमा उद्धारका लागि निःशुल्क टिपर सेवा उपलब्ध गराइरहेको र महासंघका पदाधिकारीहरू कार्यक्षेत्रमै खटिएर खोजी कार्यमा जुटेको जानकारी दिइएको छ ।
यसैबीच, अरनिको यातायात कम्पनी प्रालिले ठूलो भौतिक क्षति व्यहोरे पनि सामाजिक उत्तरदायित्वअन्तर्गत प्रधानमन्त्री राहत कोषका लागि १ लाख ११ हजार १११ रुपैयाँको चेक महासंघमार्फत हस्तान्तरण गरेको छ ।
बाढीपहिरोका कारण काठमाडौं जोड्ने लाइफलाइन मानिने पृथ्वी राजमार्गको कृष्णभीर, परेवा भीर र मलेखु पुल लगायतका क्षेत्र क्षतविक्षत भएको महासंघले जनाएको छ ।
सडक अवरुद्ध हुँदा पेट्रोलियम पदार्थ र ग्यास बोक्ने ठूला सवारी साधनहरू बीच बाटोमै रोकिएका छन् । महासंघले वैकल्पिक मार्गहरूबाट सेवा दिने प्रयास भइरहेको भएपनि देशभरका सडक सञ्जाल अस्तव्यस्त रहेकाले मर्मत कार्यलाई तिब्रता दिन सङ्घीय, प्रदेश र स्थानीय सरकारको ध्यानाकर्षण गराएको छ ।–न्युज एजेन्सी नेपाल
