इस्लामाबादः पाकिस्तानको संसदले आगामी संसदीय निर्वाचनमा विद्युतीय मतदान प्रणालीलाई अपनाउने एउटा विधेयकलाई बुधबार स्वीकृत गरेको छ । तर निर्वाचनमा धाँधली गर्न सरकारले विद्युतीय मतदानको व्यवस्था गर्न लागेको भन्दै विपक्षीहरुले विरोध जनाएका छन् ।
समाचार संस्था रोयटर्सका अनुसार, विपक्षी सांसदहरुले प्रस्तावित कानुनको मस्यौदाका प्रति संसदको हलभित्रै च्यातेर विरोध जनाएका थिए । उनीहरुले संसदभित्र नाराबाजी गर्नुका साथै प्रधानमन्त्री इमरान खानमाथि मत चोरीको आरोप समेत लगाएका थिए ।
संसदको बैठक बहिस्कार गरेर बाहिर निस्केपछि बोल्दै विपक्षी दलका नेता शहबाज शरिफले भने, “हाम्रो संसदीय इतिहासमा आज अँध्यारो दिन हो भन्ने मेरो विश्वास छ । हामी यसको निन्दा गर्दछौं ।”
प्रस्तावित विधेयकका सम्बन्धमा संसदमा मतदान हुँदा पक्षमा २२१ मत परेको थियो भने विपक्षमा २०३ मत खसेको थियो ।
खान सरकारले यो विधेयक पारित गर्न महिनौंदेखि प्रयास गरिरहेको थियो । यो विधेयकले कानुनको स्वरुप लिएपछि विदेशमा रहेका पाकिस्तानी नागरिकले पनि अनलाइन मार्फत् संसदको निर्वाचनमा भाग लिन पाउने छन् ।
यो विधेयक पारित भएसँगै प्रधानमन्त्री इमरान खानले विदेशमा रहेबसेका झण्डै ९० लाख पाकिस्तानीको व्यापक समर्थन प्राप्त गर्ने सम्भावना छ ।
पाकिस्तानमा आगामी सन् २०२३ मा संसदको निर्वाचन हुँदैछ ।
पाकिस्तानमा भएका हरेक निर्वाचनमा एकअर्का दलविरुद्ध धाँधलीको आरोप प्रत्यारोप हुने प्रचलन झैं भइसकेको छ । प्रधानमन्त्री खानले भने विद्युतीय मतदान र गणना विधिले पारदर्शिता सुनिश्चित गर्ने दाबी गर्दै आउनु भएको छ ।
विपक्षी दल र धेरै राजनीतिक विश्लेषकहरुले आगामी निर्वाचनमा खान र उनको दल पराजित हुने अनुमान गरिरहेका छन् ।
खान सरकार अहिले आर्थिक संकट र बढ्दो मुद्रास्फितीसँग जुधिरहेको छ ।
विपक्षीहरुले पाकिस्तानी सेनाको सहयोगमा सन् २०१८ को चुनाव खानले जितेको आरोप लगाइरहेका छन् । तर खान सरकार र सेना दुबैले यस दाबीको खण्डन गरिरहेका छन् ।
विपक्षीहरुले खान सरकारले अघि बढाएको विद्युतीय मतदान कानुनको विरुद्धमा अदालतमा उजूरी गर्ने बताएका छन् ।