मुस्ताङ, भदौ ७। ‘माटोको सहर’ भनेर परिचित लोमान्थाङ उपत्यकामा बृहत् सरसफाइ गरिएको छ ।
उपत्यकाभित्र अवस्थित बस्ती वरपर प्रदूषण बढ्दै गएपछि सीमा प्रशासन कार्यालय, अन्नपूर्ण संरक्षण क्षेत्र आयोजना(एक्याप), स्थानीय आमा समूह, नेपाली सेनालगायतको पहलमा आइतबार बृहत् सरसफाइ गरिएको हो । सरसफाइ अभियानमा करिब १५० जनाको सहभागिता रहेको थियो ।
सरसफाइका क्रममा स्थानीय बजारबाट सङ्कलन भएको फोहरलाई जलाउनुका साथै ‘ल्यान्डफिल्ड साइड’ मा लगेर जलाइएको एक्याप लोमान्थाङका प्रमुख सन्तोष शेरचनले जानकारी दिए । फरक भू–बनोट, माटोले निर्मित घर तथा आवास गृहका कारण लोमान्थाङलाई माटो सहरका रुपमा चिनिन्छ । लोमान्थाङमा रहेको पूर्व राजपरिवारको दरबार र उपत्यकाको सबै घर, आँगन र सार्वजनिक स्थानमा पनि सरसफाइ गरिएको छ ।
स्थानीयलाई नियमित सरसफाइ गर्न प्रेरित गर्ने उद्देश्यले सफाइ गरिएको सीमा प्रशासन कार्यालयका प्रमुख कृष्णप्रसाद ढकालले बताए । लोमान्थाङ एकै गाउँमा रहेको गाविस पनि हो । “यहाँ बसोबास पनि धेरै छ र जनघनत्व पनि त्यहीअनुसारको छ”, ढकालले भने, “त्यसैले, फोहर बढ्ने हुँदा त्यसलाई नियमित रुपमा व्यवस्थापन गर्नुपर्छ ।” रासस
