त्रिभुवन अन्तराष्ट्रिय विमानस्थलबाट ४० वायुसेवा कम्पनीले अन्तराष्ट्रिय र २ सयले आन्तरिक उडान भर्दै आएका छन् । जसमध्ये २८ ले सेवा लिएबापतको शुल्क बुझाउन अटेरी गर्दै आएका छन् ।

आन्तरिक उडान भर्ने कम्पनीको वक्यौता पनि धेरै नै छ । अन्तराष्ट्रिय उडानतर्फ बक्यौता नतिर्नेमा सबैभन्दा बढि नेपाल एयरलाइन्स, एयर एसिया, हिमालय एयरलाइन्स र एयर इन्डिया छन् ।

वायुसेवा कम्पनीले विमानस्थल विकास, ल्यान्डिङ र पार्किङ, हवाई परिवहन सञ्चालन उपकरणको प्रयोग, सुरक्षासहितका लागि विमानस्थललाई शुल्क बुझाउनुपर्छ । तर, विभिन्न वायुसेवा कम्पनीले सेवा शुल्क वापत विमानस्थललाई ६८ करोड ९२ लाख ५८ हजार ३ सय ३९ रुपैयाँ तिरेका छैनन् । विमानस्थलले पार्किङ गरेका जहाजसँग जहाजको तौलका आधारमा प्रत्येक घण्टाको रकम लिने गर्दछ । यस्तै, वायुसेवा निगमले जहाजसँग यात्रु सुरक्षा सेवा भन्दै प्रति यात्रु १ हजार १ सय ३० र विमानस्थल विकास शुल्क वापत एकहजार लिदैं आएको छ ।

कसले कति पैसा तिर्न बाँकी छ ?

– नेपाल एयरलाइन्स : २४ करोड ४७ लाख
– एयर एसिया : १५ करोड १३ लाख
– हिमालय एयरलाइन्स : ९ करोड १६ लाख
– एयर इन्डिया : ४ करोड ८७ लाख
– मलेसियन एयरलाइन्स : ४ करोड
– चाइना इस्टर्न एयरलाइन्स : १० करोड
– सिचुवान एयरलाइन्स : २ करोड
–जेट एयरलाइन्स : १० करोड

विमानस्थल प्रशासनका अनुसार अन्तराष्ट्रिय र आन्तरिक उडान भर्ने ७० कम्पनीसँग रकम असुल्न बाँकी छ । यसअघिको नेतृत्वले वास्ता नगरेका कारण विमानस्थलले उठाउनु पर्ने सेवा शुल्कबापतको रकममा बृद्धि भएको विमानस्थलका महाप्रवन्धक राजकुमार क्षेत्रीले जानकारी दिए । उनका अनुसार पछिल्लो समय अन्तराष्ट्रिय उडान भर्ने वायु सेवा कम्पनीहरुलाई ताकेता गरेपछि कछ्वा गतिमा रकम उठ्न थालेको छ ।
आन्तरिक उडान भर्ने कम्पनीतर्फ सौर्य एयरलाइन्स र सिम्रिक एयरलाइन्सको बक्यौता रकम सबैभन्दा धेरै छ । अन्य निजी हवाई सेवाप्रदायक कम्पनीहरूको पनि करोडभन्दा बढी रकम बक्यौता रहेको र असुलीका लागि ताकेता भइरहेको महाप्रबन्धक क्षेत्रीको भनाई छ । ‘रकम होल्ड गरी राख्ने वायुसेवा कम्पनीको जहाज अवतरण र उडानमा रोक लगाइदिन्छ्ु ।’ उनले भने, ‘विमानस्थलको आम्दानी भनेकै त्यही रकम हो । त्यो नै नदिएपछि कसरी चल्छ ?’