काठमाडौं – आधुनिक प्रविधिसम्बन्धी जानकारी दिने उद्देश्यले काठमाडौंमा अायाेजित नवौं राष्ट्रिय सूचना–प्रविधि एवम् चौथौ अन्तर्राष्ट्रिय स्मार्ट कम्प्युटिङ सम्मेलन सम्पन्न भएको छ ।
कलेज अफ इन्फरमेशन टेक्नोलोजीको आयोजनामा गरिएको उक्त सम्मेलनको नेपाल ईन्जिनियरिङ परिषदका अध्यक्ष ई. डिल्लीरमण निरौलाले उद्घाटन गर्नुभएकाे थियाे ।
सम्मेलनमा चीन, भारत, थाइल्यान्ड र जापानका युवा विद्यार्थी तथा शोधकर्ताहरुको सहभागिता रहेको एनसिआईटी कलेजका निर्देशक बिजुली प्रसाद राणाले जानकारी दिनुभयाे । सम्मेलनमा ३९ वटा कार्यपत्र प्रस्तुत गरिएको थियाे।
एनसिआईटी कलेजका प्रिन्सिपल निरञ्जन खकुरेलले संसारलाई स्मार्ट प्रविधिमैत्री बनाउन भएका अभ्यासहरुका बारेमा सम्मेलनमा छलफल गरिएको बताउनुभयाे । कार्यक्रममा अन्तराष्ट्रिय सूचना तथा प्रविधि विज्ञहरुकोसमेत सहभागिता रहेको थियाे ।
सम्मेलनमा भारतको नयाँ दिल्लीस्थित साउथ एसियन युनिभर्सिटीका एसोसिएट प्रोफेसर डा. मोहम्मद एबुल्लाहले सूचना तथा प्रविधिसम्बन्धी आफ्नो प्रस्तुतिकरण दिनुभएकाे थियाे ।
देश तथा विदेशबाट ६० भन्दा बढी ‘पेपर’ प्राप्त भएको र यसमध्थे उत्कृष्ट ३९ वटा कार्यपत्र प्रस्तुत गरिएका थिए ।
मोबाइल कम्युटिगं, स्मार्ट कम्युटिगं, क्लाउड कम्प्युटिगं, ग्रिन कम्प्युटिगं, बिग डाटा, अप्टिकल कम्युनिकेशन्स एण्ड नेटवर्किगं, नेटवर्क म्यानेजमेन्ट एण्ड सर्भिस, इन्डस्ट्रियल रोबोटिक्स, आइसिटी फर डिजास्टर म्यानेजमेन्ट लगायतका विषयमा विभिन्न शोधकर्ताले अनुसन्धानात्मक कार्यपत्र प्रस्तुत गरेका थिए ।
आइटी विद्यार्थी, सरोकारवाला र सूचना तथा प्रविधिमा अनुसन्धानरत व्यत्तिहरुको लागि यो महत्वपूर्ण मञ्च भएको एनसिआइटीका प्रिन्सिपल खकुरेलले विश्वास व्यक्त गर्नुभयाे । उहाँले भन्नुभयाे, ‘यो सम्मेलन मुलुकको सूचना तथा प्रविधिका क्षेत्रमा फलदायी भएको छ ।’
