काठमाडौँ । नेपाल सरकारले टेन्डर आहवान गरी चीनबाट खरिद गरेको भनिएका बस चीनबाट खरिद नै नगरेको पाइएको छ । सरकारले किनेको पाँचवटा विद्युतीय चीनमा नभइ भारतमा बनेको पाइएको हो ।
संस्कृति, पर्यटन तथा नागरिक उड्डयन मन्त्रालय र बीवाईडी साइमेक्सबीच भएको टेन्डर सम्झौतामा २ करोड रुपैयाँमा ती बस लुम्बिनी विकास कोषका लागि खरिद गरेको थियो ।
नेपाल भित्र्याउदा ति बस वीरगन्ज भन्सारमा भारतमा उत्पादन भनेर भन्सार तिरेको समेत पाइएको हो । पर्यटन मन्त्रालयद्वारा मेकानिकल इन्जिनियर (उपसचिव) दीपक देवकोटाको संयोजकत्वमा गठित प्राविधिक समितिले चेक जाँच गर्दा पनि पाँचै बसका पार्टपुर्जा छिमेकी राष्ट्र भारतमा बनेको पाइएको हो ।
मन्त्रालय र आपूर्तिकर्ता कम्पनी बीवाईडी साइमेक्सबीच भएको टेन्डर सम्झौतामा चीनमा बनेका गुणस्तरीय बस किन्ने सम्झैता भउको थियो । तर सम्झैता बिपरीत चलाउन नै नमिल्ने बस खरिद गरेको भेटिएको छ ।
समितिले बनाएको प्रतिवेदनमा ती बस गुणस्तरहीन र सार्वजनिक यातायातका लागि चलाउन अयोग्य रहेको रहेको छ ।
समितिको अध्ययन प्रतिवेदन प्राप्त भएपछि मन्त्रालयले ती बस तत्काल फिर्ता गरी टेन्डर सम्झौताअनुसार चीनमा निर्मित गुणस्तरीय बस ल्याउन निर्देशन दिएको छ । मन्त्रालयले ती बसको भुक्तानीसमेत रोकेको छ ।
प्राविधिकले स्पेसिफिकेसन अनुसारका बस आए–नआएको अध्ययन गर्नुअगावै हतारमा प्रधानमन्त्री केपी ओलीले उद्घाटन गरेका थिए । लुम्बिनी क्षेत्रमा चलाउन ल्याइएका ती बस परीक्षणका लागि काठमाडौंमा चलाउन प्रधानमन्त्री ओली स्वयंले साझा यातायातलाई हस्तान्तरण गरेका थिए । उद्घाटन क्रममा ओली ती बस चढेर सिंहदरबार गएका थिए ।
गाडीको स्पिड मिटरले तथ्यगत रूपमा सही सूचना नदिने र बसको पाङ्ग्राका नटहरू सबैजसो खिया लागेको अवस्थामा फेला परेको अध्ययन प्रतिवेदनमा उल्लेख छ ।
