काठमाडौं । एशोसिएसन अफ नेपाली ओरिजिन(एएनओ)ले भोटेकोशी नदीमा आएको विनाशकारी बाढीबाट प्रभावित नागरिकको खोज, उद्धार, राहत तथा पुनर्स्थापनाका लागि तत्काल पहल गर्न सरकार र सम्बन्धित निकायसँग आग्रह गरेको छ।
एएनओ केन्द्रीय समितिले जारी गरेको अपिलमा अगस्ट २६ मा भोटेकोशी नदीमा आएको भीषण बाढीका कारण रसुवा, नुवाकोट, सिन्धुपाल्चोकलगायतका जिल्लाका विभिन्न भूभाग प्रभावित बनेको उल्लेख गरिएको छ।
बाढीका कारण ठूलो जनधनको क्षति हुनुका साथै नागरिकहरू बेपत्ता भएको, घाइते तथा विस्थापित बनेको भन्दै एएनओले प्रभावितहरूको तत्काल खोज तथा उद्धारलाई प्राथमिकता दिन आग्रह गरेको छ।
एएनओले बाढी तथा पहिरोमा परेर घाइते भएकाहरूको स्वास्थ्य उपचार, बेपत्ताको खोजी तथा उद्धार र प्रभावित परिवारलाई आवश्यक राहत उपलब्ध गराउन सरकारसँग आग्रह गरेको छ।
त्यस्तै, प्रभावित क्षेत्रमा खाद्यान्न, शुद्ध खानेपानी, औषधि तथा अत्यावश्यक सामग्रीको आपूर्ति तत्काल सुनिश्चित गर्न पनि अपिल गरिएको छ।
एएनओ ले विपद्को यस कठिन घडीमा सबै नेपाली तथा नेपाली मूलका नागरिकलाई आ–आफ्नो ठाउँबाट सहयोग र सहकार्य गर्दै प्रभावित परिवारको साथमा उभिन आह्वान गरेको छ।
संस्थाले राष्ट्रिय विपद्को समयमा सबै नेपाली एकजुट भएर मानवीय सहयोगमा जुट्नुपर्नेमा जोड दिएको छ।
