काठमाडौं । सर्वोच्च अदालतको २८ औं प्रधानन्यायाधीशमा चोलेन्द्र शमशेर जबराको नाम अनुमोदन भएको छ । प्रधानन्यायाधीशका लागि संवैधानिक परिषद्ले गरेको सिफारिस संसदीय सुनुवाइ समितिले सर्वसम्मत रुपमा अनुमोदन गरेपछि शमशेर प्रधानन्यायाधीश बन्नुभएको हो ।

समितिको मंगलबार बसेको बैठकले प्रधानन्यायाधीशमा जबराको नाम अनुमोदन गरेको हो । यस अघि दीपकराज जोशीलाई अस्वीकृत गरेको संसदीय सुनुवाई समितिले जबरालाई सर्वसम्मत रुपमा अनुमोदन गरेको हो ।

समितिका सभापति लक्ष्मणलाल कर्णले प्रधानन्यायाधीशमा संवैधानिक परिषद्को सिफारिस अनुमोदन भएको बताउनुभयो । यस अघि आइतबार पनि प्रधानन्यायाधीशमा सिफारिस जबराको सुनुवाइ भएको थियो ।बैठकमा सांसदहरूले उठाएका प्रश्नको जवाफ जबराले दिनुभएको थियो ।
सांसदहरूले बिगतमा गरेको फैसलामा आधारित प्रश्नमा जबराले कानुन बमोजिम गरेको र कानुन बाहिर गएर कुनै पनि काम नगरेको जिकिर गर्नुभएको थियो ।

अदालत र पदको गरिमा राख्ने प्रतिबद्धता

उहाँले प्रधानन्यायाधीशका रुपमा अदालत र पदको गरिमालाई जोगाइ राख्ने प्रतिबद्धता ब्यक्त गर्नुभयोे । प्रधानन्यायाधीशमा नियुक्त जबराले आफू न्यायालयको मुहारमा कालो पोतेर आफ्नो अनुहार हातले कोतरेर रक्ताम्य पार्दै बाहिरिने मनशायमा नरहेको दावी गर्नुभयो । उहांले समितससमक्ष प्रस्तुत गरेको कार्यायोजना लागू गर्ने प्रतिबद्धता ब्यक्त गर्नुभयो ।

सांसदहरुको प्रश्नको जवाफमा जबराले कार्यपालिका, व्यवस्थापिका र न्यायपालिका आ–आफ्नो मर्यादामा कानुन अनुसार चल्नुपर्ने र एकले अर्काको कार्यक्षेत्रमा हस्तक्षेप गरे असहजता आउने बताउनुभयो । आफू प्रधानन्यायाधीश भएपछि सरकारले कानुन अनुसार गर्ने विकासका काममा न्यायालयबाट बाधा हुने फैसला हुन नदिने प्रतिवद्धता व्यक्त गर्नुभयो । राणाले उमेरहदका कारण २०७९ पुस १७ गते अनिर्वाय अवकाश पाउनुहुने भएको छ ।

प्रधानन्यायाधीशमा नियुक्त जबराले आज बुधबार सपथ लिनुहुने भएको छ । आज विहान १० बजे उहाँको सपथ ग्रहण हुने बताइएको छ । प्रधानन्यायाधीश ओमप्रकाश मिश्रको उमेर हदका कारण बुधबारबाट बिदा हुनुहुने भएको छ ।

को हुन् जबरा रु
२०१४ साल मंसिर २८ गते काठमाडौंमा जन्मिनुभएका जवरा वीर शमशेरका पनाति हुनुहुन्छ । वीर शमशेरका छोरा इन्द्र शमशेर र उहाँका छोरा युवराज शमशेरका छोरा जवरा संसदीय सुनुवाइ समितिबाट स्वीकृत हुनुभएको हो । राणा परिवारबाट त्रिलोकप्रताप राणापछि प्रधानन्यायाधीश हुन पाउने भाग्यशाली ब्यक्ति हुनुहुन्छ जबरा ।

वकालत गर्दागर्दै जवरा २०५३ बैशाख १ गते तत्कालीन पुनरावेदन अदालतको अस्थायी न्यायाधीश नियुक्त हुनुभएको थियो । लामो समय अस्थायी न्यायाधीशमै कार्यरत उहाँ स्थायी न्यायाधीश बनेपछि विशेष अदालतको सदस्य पनि हुनुभएको थियो । विशेष अदालतमा रहँदा उहाँले अख्तियार दुरुपयोग अनुसन्धान आयोगले दायर गरेका भ्रष्टाचार मुद्दा हेर्ने अबसर पनि पाउनुभएको थियो। जबरा विराटनगर हुँदा एउटा जुवाको मुद्दामा फैसला गर्दा विवादमा तानिनुभएको थियो ।

२०५८ साउन ११ गते ‘म्यारिज’ खेलेको अभियोगमा पक्राउ परेका अभियुक्तलाई सफाइ दिन ‘म्यारिज’लाई जुवा होइन भनी फैसला गरेपछि उहाँ विवादमा तानिनु भएको थियो । तर, उक्त फैसला सर्वोच्चले २०६३ माघ १ गते उल्ट्याइदिएको थियो । समाचार नेपाल समाचारपत्रमा छ ।