कठमाडौँ । प्रिमियर लिगको बलियो प्रतिद्वन्द्वी टोट्टनहामलाई पेनाल्टी सुटआउटमा हराउँदै चेल्सी काराबाओ कप फुटबलको फाइनलमा प्रवेश गरेको छ ।
बिहीबार राति भएको लिगमा चेल्सीले २–१ गोलको जित निकाल्यो । समग्रमा २–२ गोलको बराबरी भएपछि खेलको नतिजा पेनाल्टी सुटआउटबाट निकालिएको हो । पहिलो लेगमा टोट्टनहामले चेल्सीलाई १–० गोलले हराएको थियो ।
निर्धारित समयमा चेल्सीका लागि एनगोलो कान्टेले २७ औं मिनेटमा पहिलो गोल गरे । इडेन हाजार्डले ३८ औं मिनेटमा गोल गर्दै चेल्सीको अग्रता दोब्बर बनाए । ५० औं मिनेटमा टोट्टनहामका फर्नान्डो लोरेन्टेले गोल गर्दै खेललाई २–१ को स्थितिमा ल्याएका थिए । त्यसपछि दुवै टोलीले गोल गर्न नसक्दा खेल बराबरीमा पुगेको थियो ।
त्यसपछि पेनाल्टी सुटआउटमा चेल्सीक विलियन, सेजर एज्पीलिक्वेटा, जर्गिन्हो र डेभिड लुइजले गोल गरे । टोट्टनहामका क्रिस्टियन इरिक्सन र इरिक लमेलाले मात्र गोल गर्न सके । अब फाइनलमा चेल्सीले म्यानचेस्टर सिटीसँग प्रतिस्पर्धा गर्नेछ । सिटीले तेस्रो डिभिजन क्लब बर्टन अल्वियोनलाई समग्रमा १०–० गोलले हराउँदै फाइनलमा स्थान बनाएको हो । एजेन्सी
