काठमाडौँ । काठमाडौँ मल खाली गराउने कर्मचारी सञ्चय कोषको निर्णयविरुद्ध व्यवसायीले आन्दोलन थाल्ने चेतावनी दिएका छन् । गुण्डा नाइके राजु गोरखाली समूहसँग ठेक्का सम्झौता तोडेपछि झण्डै ३ सय पसल रहेको उक्त भवनलाई ‘कर्पोरेट हाउस’ बनाउन पसलहरु हटाउन आग्रह गरेको थियो ।
तर,कोषले जारी गरेको सूनाको आधारमा २१ दिनको अवधिमा पसल सञ्चालकहरुले मल खाली नगरे बल प्रयोग गर्ने चेतावनी दिएपछि गैर कानूनी ढंगले पसल हटाउन लागेको भन्दै व्यवसायी विरोधमा उत्रिन लागेका हुन् । त्यहाँका व्यवसायीहरुको छाता संगठन ‘द काठमाडौँ मल व्यापार संघ’ले भोलि मंगलबार पत्रकार सम्मेलन गरी विरोधका कार्यक्रम सार्वजनिक गर्ने जनाएको छ ।
निजी लगानीमा खेलेको पसलमाथि जथाभावी गर्न नपाइने संघकी अध्यक्ष सुष्मा महराले बताइन् ।ठेकदारसँगको असन्तुष्टिले कोषले व्यवसायीलाई मर्कामा पार्न नहुने उनको भनाइ छ ।
मलमा झण्डै ३ सय पसल छन् । मलका झ्यालढोका फोडेर अगाडि–पछाडि, दायाँबायाँ ३७ वटा टहरामा पनि पसल सञ्चालनमा छन् ।
माघ १३ गते एक महिने सूचना जारी भएकोमा ५ फागुनमा पुनः सूचना जारी गर्दै सञ्चय कोषले आफ्नो स्वामित्वमा रहेको मलका पसल खाली गर्न व्यवसायीलाई २१ दिने अल्टिमेटम दिएको थियो ।
