काठमाडौँ। पोखरा बस व्यवसायी समिति (पोखरा यातायात कम्पनी प्रा.लि.) ले रसुवा बाढीबाट प्रभावितहरूको राहत तथा उद्धारका लागि प्रधानमन्त्री दैवी प्रकोप उद्धार कोषमा ४ लाख रुपैयाँ आर्थिक सहयोग गर्ने निर्णय गरेको छ ।
समितिको हालै सम्पन्न साधारण सभाले देशमा आइपरेको वर्तमान सङ्कटको घडीमा मलम लगाउन उक्त रकम प्रदान गर्ने निर्णय गरेको हो ।
पोखरा यातायात व्यवसायी संघका सल्लाहकार, पोखरा महानगरपालिकाका यातायात सहसंयोजक एवं वडा नम्बर १६ का अध्यक्ष अमृत तिमील्सिनाले साधारण सभाले उक्त सहयोगको औपचारिक निर्णय गरेको जानकारी दिनुभयो ।
नेपाल यातायात व्यवसायी राष्ट्रिय महासंघका अध्यक्ष पुण्यप्रसाद सिटौलाले यातायात क्षेत्र आफैँ प्राकृतिक विपत्तिबाट गम्भीर रूपमा प्रताडित भइरहेको उल्लेख गर्नुभयो ।
उहाँले यस्तो कठिन परिस्थितिमा पनि यातायात व्यवसायीहरू नागरिकको सेवा, उद्धार र राहत कार्यमा देशैभरि अग्रपंक्तिमा खटिरहेको बताउनु भयो ।
अध्यक्ष सिटौलाले हालैका बाढी–पहिरोका कारण सार्वजनिक यातायात क्षेत्रमा अर्बौंको क्षति हुनुका साथै ठूलो संख्यामा यात्रु, चालक र सहचालकहरूले ज्यान गुमाउनुपरेको भन्दै दुःख व्यक्त गर्नुभयो ।
उहाँले भन्नुभयो, ‘अहिलेसम्म सरकारको तर्फबाट कति सवारी साधन र कति मजदुर–यात्रुहरू बेपत्ता भए भन्ने यकिन तथ्यांक आउन सकेको छैन ।त्रिशूली र रसुवा लगायतका क्षेत्रमा व्यवसायीहरूले परिवारका सबै सदस्य गुमाउनुपरेको विक्षिप्त अवस्था छ ।’
अध्यक्ष सिटौलाले सरकारलाई युद्धस्तरमा उद्धार कार्य अघि बढाउन र सबै राजनीतिक दल तथा सरोकारवालालाई मानवीय सेवामा जुट्न अपिल गर्नुभयो ।–न्युज एजेन्सी नेपाल
