काठमाडौं । चेल्सीले इंग्लिस प्रिमियर लिग फुटबलमा फुलहृयामलाई पराजित गरेको छ ।
आइतबार राति भएको खेलमा चेल्सीले उसैको मैदानमा फुलहृयामलाई २–१ गोल अन्तरले पराजित गरेको हो । चेल्सीको जितमा गोन्जालो हिगुइन र जोर्गिन्होले गोल गरे । यता फुलहृयामका लागि कलम च्याम्बर्सले गोल फर्काएका थिए ।
तीनै गोल पहिलो हाफमा भएको थियो । हिगुइनले २० औं मिनेटमा गोल गर्दै चेल्सीलाई अग्रता दिलाएका थिए । फुलहृयामका लागि २८ औं मिनेटमा च्याम्बर्सले गोल १–१ गोलको बराबरीमा पुर्याएका थिए । ३१ औं मिनेटमा जोर्गिन्होले गोल गरेपछि पहिलो हाफसम्म चेल्सीले २–१ को अग्रता बनाएको थियो ।
पहिलो हाफमा २–१ गोलको अग्रता बनाएको चेल्सीले आफ्नो अग्रतालाई दोस्रो हाफमा कायमै राख्न सफल भयो ।
जितपछि २८ खेल खेलेको चेल्सीको ५६ अंक भएको छ । पराजित फुलहृयामको भने समान खेलबाट १७ अंक मात्रै छ ।
आइतबार राति भएको अर्को खेलमा लिभरपुलले एभर्टनसँग गोलरहित बराबरी खेल्दै अंक बाँडेको छ। कमजोर मानिएको एभर्टनसँग बराबरी खेलेसँगै लिभरपुलले शीर्ष स्थानमा पुग्ने अवसरलाई पनि गुमाएको छ ।
लिभरपुलविरुद्ध एभर्टनले उत्कृष्ट प्रदर्शन गर्यो । खेलअवधिभर आफ्नो पकडमा बल नियन्त्रण राख्न सकेपनि लिभरपुलले गोल गर्न भने सकेन । पहिलो हाफमा गोल गर्ने अवसर पाएपनि त्यसको सदुपयोग गर्न नसक्दा लिभरपुलले खेल बराबरीमा टुंग्याएको हो ।
बराबरीसँगै लिभरपुलको २९ खेलबाट ७० अंक रहेको छ । शीर्ष स्थानमा रहेको म्यान्चेस्टर सिटीको भने समान खेलबाट ७१ अंक छ । यता, एभर्टनको भने २९ खेलबाट ३७ अंक मात्रै छ । लिगको तेस्रो स्थानमा रहेको टोटनहृयामको २९ खेलबाट ६१ अंक हुँदा चौथो स्थानमा रहेको म्यान्चेस्टर युनाइटेडको ५८ अंक छ ।
लिगअन्तर्गत नै भएको अर्को खेलमा लेष्ट सिटी वाटफोर्डसँग २–१ गोलअन्तरले पराजित भएको छ ।
