ललितपुर । राजश्व अनुसन्धान विभागले झुट्टा तथा नक्कली बिजक बिक्री गरी राजश्व छलिमा संलग्न मुख्य आरोपी दुई व्यक्तिमाथि एक अर्ब ७५ करोड बिगो कायम गरी जिल्ला अदालत काठमाडौंमा मुद्दा दायर गरेको छ ।
विभागले उक्त नक्कली बिल बिजक बिक्री गरेको आरोपमा जयकिशोर साह र परमेश्वर साहलाई पक्राउ समेत गरेको छ । उनीहरुले बिक्री गरेका नक्कली बिजकका कारण भएको राजश्व बापत रु. एक अर्ब ७५ करोड बिगो दाबी गरिएको छ ।नक्कली बिल बिजकमा संलग्न २४ वटा फर्ममाथि समेत कारबाही गरिएको छ ।
विभागका महानिर्देशक दिर्घराज मैनालीले विभागमा आयोजित पत्रकार सम्मेलनमा बिल बिजक बेचेरै मुख्य प्रतिबादीहरुले काठमाडौंको मुख्य स्थानमा घर बनाएको बताउनुभयो । उहाँले भन्नुभयो, “फर्महरुका कारण कूल कारोबारको ३८ प्रतिशतसम्म राजश्व छलि भएको छ जसमा भ्याट बापतको १३ प्रतिशत र आयकर बापतको २५ प्रतिशत मात्र समावेश छ । तर भन्सार समेत छलेको भए राजश्व हिनामिनाको अङ्क अझ ठूलो हुनसक्छ ।”
उहाँले भन्नुभयो, “यी २४ फर्मको खरिद छैन, बिक्री मात्र गरेको देखिएको छ । एक वर्ष ठूलो कारोबार भएको देखिन्छ, अर्को वर्ष केही कारोबार नै छैन । र भएपनि ज्यादै कम मात्र कारोबार भएको देखिन्छ ।”
विभागका महानिर्देशक मैनालीका अनुसार कम्पनी रजिष्ट्रारको कार्यालयमा कामदारहरुको नाममा कम्पनी दर्ता गर्ने, आन्तरिक राजश्व कार्यालयबाट भ्याट दर्ता गर्ने र अर्को दिन बैंकमा खाता खोल्ने गरेको अनुसन्धानबाट देखियो ।
मुख्य आरोपी जयकिशोर र परमेश्वरले कम्पनी खोलेसँगै लगत्तै प्रिन्टिङ प्रेसबाट भ्याट बिल छाप्थे, र बजारमा बिक्री गर्थे । यी बिलहरु साना फर्महरुदेखि आपूर्तिकर्ता, निर्माण व्यवसायी, अर्को कम्पनी लगायतलाई बिक्री गरिन्थ्यो । यस्ता बिलको सहायताबाट फर्महरुले प्रत्यक्ष रुपमा मूल्य अभिवृद्धि कर (भ्याट) र आयकर छल्न सहयोग पुग्थ्यो ।
निम्न स्तरका मजदुरहरुलाई आर्थिक प्रलोभनमा पारी तिनीहरुको नाममा फर्म कम्पनी खोल्ने गरेको पनि अनुसन्धानबाट थाहा लागेको विभागको भनाई छ । विभागका अनुसार, फर्मको खाता सञ्चालन तिनै मजदुर वा नक्कली बिलको कारोबार गर्ने व्यक्तिले आफूलाई कर्मचारीको रुपमा प्रस्तुत गरी दुबै जनाको दस्तखत कार्ड पेश गर्ने र कुनै एक जनाको दस्तखतबाट बैंक कारोबार गर्ने गरेको पाइयो ।
विभागका महानिर्देशक मैनालीले भन्नुभयो, “अनुसन्धानबाट यसको व्यापकता र विकराल रुपमा कर छलिको गम्भीर अवस्था छ भन्नेमा विभाग पुगेको छ ।”विभागले यस प्रकरणका मुख्य दोषी परमेश्वर साहलाई माघ ३ गते र जय किशोर साहलाई माघ ४ गते पक्राउ गरेको थियो ।
भ्याट छलिमा नेपालको इतिहासमै यो दोस्रो ठूलो कारबाही हो । यसअघि करिब ६ अर्ब भ्याट छलिमा अनुसन्धान भई अख्तियार दुरुपयोग अनुसन्धान आयोग समेत विभिन्न निकायले अनुसन्धान गरिरहेका छन् ।
विभागले राजश्व चुहावट (अनुसन्धान तथा नियन्त्रण) ऐन बमोजिम मुख्य आरोपीमाथि बिगोको दोब्बरसम्म जरिवाना र तीन वर्षसम्म कैद सजाय माग गरी अदालतमा मुद्दा दर्ता गरेको छ ।
