काठमाडौं । यस वर्ष कालिकोटमा सवारीसाधन कारबाही तेब्बरले वृद्धि भएको पाइएको छ । गत वर्ष ९९० सवारीसाधन कारबाहीमा परेकामा चालू आवको आठ महिनामा कालिकोटमा २ हजार ५५७ सवारीसाधन चालक कारबाहीमा परे ।
कारबाहीमा परेकामध्ये सबैभन्दा बढी मोटरसाइकल चालक छन् । जिल्ला ट्राफिक प्रहरी कार्यालयका अनुसार चालू आवमा कारबाहीमा परेका चालकबाट ट्राफिक प्रहरीले १४ लाख ३३ हजार ५ सय राजस्व संकलन गर्यो ।
ट्राफिक इन्चार्ज नमराज भट्टका अनुसार चालू आवको फागुन मसान्तसम्ममा कारबाहीमा परेका चालकबाट उक्त राजस्व संकलन भएको हो । चालू आवको फागुनमा मात्रै सबैभन्दा बढी राजस्व संकलन भएको थियो । भट्टका अनुसार मंसिरमा मात्रै १९४ सवारी चालक कारबाहीमा पर्दा १ लाख ११ हजार ५ सय राजस्व संकलन भयो । साउनमै ४४ सरकारी मोटरसाइकल कारबाहीमा परेका छन् । जसबाट प्रहरीले ७० हजार ५ सय राजस्व संकलन गरेको छ । आठ महिनामा १३६ मोटरसाइकल कारबाहीबाट २ लाख १७ हजार र २१६ वटा बस चालक कारबाहीमा पर्दा २ लाख १० हजार राजस्व संकलन भएको छ ।
३५० ट्रक कारबाहीमा पर्दा २ लाख १७ हजार र २५ वटा टेम्पो तथा ई–रिक्सा कारबाहीमा पर्दा १ लाख राजस्व संकलन भएको जिल्ला ट्राफिक प्रहरी कार्यालयको तथ्यांकमा उल्लेख छ ।
पछिल्लो समय जिल्लाका ग्रामीण भेगमा चरिरहेका सवारीसाधनमा सरकारी कर्मचारीदेखि लिएर जनप्रतिनिधिले बिनाअनुमतिपत्र सरकारी मोटरसाइकलको दुरुपयोग गरिरहेको जानकारी पाएको ट्राफिक कार्यालयका इन्चार्ज नमराज भट्टले बताए । बर्सेनि सवारी चाप बढ्नु र ट्राफिक नियम जानाजान उल्लंघन गर्नुले बढी सवारी चालक कारबाहीमा पर्ने गरेको उनको भनाइ छ ।
चालू आवमा मात्रै ट्राफिक प्रहरीले ३ हजार ३९३ विद्यार्थीलाई ट्राफिक नियमका विषयमा जानकारी गराएको छ । २३ वटा विभिन्न विद्यालयमा प्रहरीले फरकफरक मितिमा कार्यक्रम गर्दै चेतना अभिवृद्धि गरे पनि प्रहरी अभियान सफल हुन सकेको छैन ।
ट्राफिक प्रहरीले सामुदायिक सेवामार्फत व्यावसायिक चालक तथा परिचालक र सर्वसाधारणलाई पनि सचेतना जगाउन कार्यक्रम सञ्चालन गरेको छ ।राजधानी दैनिकमा खबर छ ।
