काठमाडौं । सहिद स्मारक ए डिभिजन लिग फुटबल अन्तर्गत आज (शनिबार) दुई खेलहरु हुँदैछन् ।
त्रिपुरेश्वरस्थित दशरथ रंगशालामा संकटा क्लब र मनाङ मर्स्याङ्दी क्लबबीच पहिलो खेल हुनेछ । उक्त खेल दिउँसो १ बजे सुरु हुनेछ ।
दोस्रो जितको खोजीमा रहेको संकटा २ खेलमा ४ अंक जोडेर पाँचौं स्थानमा रहेको छ ।
यता मनाङ भने लगातार तेस्रो जितको खोजीमा रहनेछ । अपराजित मनाङ २ खेलमा ६ अंक जोडेर दोस्रो स्थानमा रहेको छ ।
यस्तै दोस्रो खेल अन्तर्गत च्यासल युथ क्लब र न्युरोड टिम एनआरटीबीच प्रतिस्पर्धा हुनेछ । सो खेल ४ः४५ बजे सुरु हुनेछ ।
च्यासल दोस्रो जितको खोजीमा हुनेछ । च्यासलले अघिल्ला दुई खेलमा १ जित र एक हार व्यहोरेको छ ।
च्यासल २ खेलमा ३ अंक जोडेर आठौं स्थानमा रहेको छ ।
पहिलो जितको खोजीमा रहेको एनआरटीले २ खेलमा १ अंक जोड्दै लिगको १२ औं स्थानमा रहेको छ ।
