काठमाडौ । राष्ट्रिय स्वतन्त्र पार्टी (रास्वपा) को केन्द्रीय सदस्यका लागि आज बिहानदेखि मतदान सुरु हुँदैछ।
केन्द्रीय निर्वाचन आयोगका प्रमुख भुवन केसीका अनुसार राति अबेरसम्म मनोनयन भइरहेकाले प्रथम चरणको नामावली निकाल्ने तयारी भइरहेको छ ।
उहाँले भन्नुभयो, “एकिन सङ्ख्या निकाल्दै छौँ, चार सयभन्दा बढीको उम्मेद्वारी परेको छ । आज बिहान ९ः०० बजे नामावली प्रकाशन गरिनेछ ।”
केन्द्रीय सदस्य र पदाधिकारीको मतदानमा इलेक्ट्रोनिक भोटिङ मेसिन (ईभीएम) सँगै मोबाइल एप प्रयोग गर्ने तयारी रास्वपाले गरेको छ। मतदान स्थलमा ८० ओटा मसिन तयारी अवस्थामा राखिएको केसीले बताउनु भयो ।
केसीका अनुसार मतदान सकिएको दुई घण्टामै मतपरिणाम आउँछ।’
रास्वपाको महाधिवेशनमा दुई चरणमा निर्वाचन गर्ने पार्टी विधानमा व्यवस्था छ।
विधानअनुसार पहिलो चरणमा सभापति र ९९ केन्द्रीय सदस्यको निर्वाचन हुनेछ। दोस्रो चरणमा पदाधिकारीको निर्वाचन हुने व्यवस्था रास्वपाको विधानमा छ। ९९ केन्द्रीय सदस्य पदका लागि ४०० बढीको उम्मेदवारी परेको आयोगले जनाएको छ ।
केन्द्रीय सदस्यमा निर्वाचित हुने नेता मात्रै पदाधिकारीको उम्मेदवार बन्न पाउनेछन्।
रास्वपाले यसपटक विधान संशोधन गरेर पदाधिकारीको संख्या १९ पुर्याइएको छ। यसअघि रास्वपामा पदाधिकारी संख्या १२ थियो ।
तस्बिर : चन्द्रकला क्षेत्री/रासस
