काठमाडौं । राष्ट्रिय स्वतन्त्र पार्टी (रास्वपा) को प्रथम महाधिवेशनअन्तर्गत बुधबार केन्द्रीय नेतृत्व चयनका लागि हुने निर्वाचनलाई केन्द्रमा राख्दै उम्मेदवारहरूले मत माग्ने अभियानलाई तीव्र बनाएका छन्। महाधिवेशन स्थल तथा आसपासका क्षेत्रमा उम्मेदवारहरू प्रतिनिधिहरूसँग प्रत्यक्ष भेटघाट, आफ्ना योजना प्रस्तुत गर्दै समर्थन जुटाउने प्रयासमा देखिएका छन्।
महाधिवेशनको पहिलो चरणको निर्वाचनबाट पार्टीले नयाँ नेतृत्व संरचना चयन गर्ने तयारी गरेको छ। यस चरणमा एक जना सभापति र ९९ जना केन्द्रीय सदस्य चयन हुनेछन्। सभापतिमा रवि लामिछाने निर्बिरोध भै सक्नु भएको छ ।
केन्द्रीय निर्वाचन आयोगका अनुसार विभिन्न समूह तथा पदहरूमा गरी चार सयभन्दा बढी उम्मेदवारी परेको छ। उम्मेदवारहरूको संख्या उल्लेख्य रहेकाले प्रतिस्पर्धा पनि निकै रोचक र तीव्र बनेको छ। उम्मेदवारहरू आफ्नो अनुभव, राजनीतिक दृष्टिकोण, संगठन निर्माणको योजना तथा पार्टीलाई आगामी दिनमा कसरी अघि बढाउने भन्ने एजेन्डा प्रस्तुत गर्दै मतदाताको विश्वास जित्ने प्रयास गरिरहेका छन्।
महाधिवेशन प्रतिनिधिहरूले पनि उम्मेदवारहरूको प्रस्तुति, पार्टीप्रतिको योगदान, संगठनात्मक क्षमता र भावी योजनालाई आधार बनाएर मतदान गर्ने बताएका छन्। निर्वाचन प्रक्रियालाई व्यवस्थित, निष्पक्ष र पारदर्शी बनाउन आवश्यक तयारी पूरा गरिएको निर्वाचन आयोगले जनाएको छ।
पार्टी स्थापना भएपछि पहिलोपटक भइरहेको महाधिवेशन भएकाले यसलाई रास्वपाको संगठनात्मक विकास र आन्तरिक लोकतन्त्रको अभ्यासका रूपमा समेत हेरिएको छ।
निर्वाचनको नतिजाले आगामी दिनमा पार्टीको शक्ति सन्तुलन, नेतृत्वको शैली तथा राजनीतिक प्राथमिकतामा महत्वपूर्ण प्रभाव पार्ने अनुमान गरिएको छ। मतदान प्रक्रिया सम्पन्न भएपछि मतगणना सुरु गरिने र क्रमश: परिणाम सार्वजनिक गरिने कार्यक्रम रहेको छ।
तस्बिरः सनद अधिकारी÷रासस
