काठमाडौं । विश्वभरका ब्रान्ड तथा कन्टेन्ट क्रिएटरहरूका लागि भिडियो निर्माण प्रक्रिया र संगीत लाइसेन्सिङलाई सरल बनाउने उद्देश्यसहित इपिडेमिक साउन्ड (Epidemic Sound) र एआई–सञ्चालित क्रिएटरअप्स प्लेटफर्म भिल (Veel) ले नयाँ एपीआई (API) साझेदारी घोषणा गरेका छन्।
इपिडेमिक साउन्डले जारी गरेको प्रेस विज्ञप्तिअनुसार यस साझेदारीमार्फत कम्पनीको सम्पूर्ण संगीत तथा साउन्ड इफेक्ट्स क्याटलग भिल प्लेटफर्ममा प्रत्यक्ष रूपमा एकीकृत गरिएको छ। अब प्रयोगकर्ताले प्लेटफर्मभित्रै लाइसेन्स प्राप्त अडियो सामग्री प्रयोग गरी भिडियो निर्माण गर्न, सामाजिक सञ्जालमा वितरण गर्न तथा विश्वव्यापी रूपमा मुद्रीकरण गर्न सक्नेछन्।
कम्पनीहरूका अनुसार यो सहकार्यले संगीत लाइसेन्सिङसँग जोडिने जटिल प्रक्रिया हटाउँदै कन्टेन्ट निर्माणलाई थप सहज बनाउने लक्ष्य राखेको छ। इपिडेमिक साउन्डको पूर्ण स्वामित्वमा रहेको संगीत क्याटलगले क्रिएटर र ब्रान्डलाई कपीराइट दाबी वा सामग्री हटाइने जोखिमबिना डिजिटल प्लेटफर्ममा सामग्री प्रकाशित गर्न सहयोग गर्ने बताइएको छ।
इपिडेमिक साउन्डका बीटुबी (B2B) विभागका वरिष्ठ उपाध्यक्ष रास्मस थोफ्टेले रचनात्मक गुणस्तर, कानुनी सुरक्षा र सहज प्राविधिक एकीकरण भएका साउन्डट्र्याक समाधानप्रतिको माग बढ्दै गएको बताए। उनका अनुसार लाइसेन्स प्राप्त संगीतमा सहज पहुँचले क्रिएटरलाई सिर्जनात्मक काममा बढी केन्द्रित हुन सहयोग पुर्याउनेछ।
भिलका संस्थापक तथा प्रमुख कार्यकारी अधिकृत दिलीप ढकालले यस साझेदारीलाई ग्राहकका लागि परिवर्तनकारी कदमको रूपमा वर्णन गर्दै विश्वस्तरीय अडियो क्याटलगमा पहुँचसँगै कन्टेन्ट उत्पादनसम्बन्धी कानुनी अनिश्चितता कम हुने बताए।
हाल भिलले १२१ देशका ५ लाख ५० हजारभन्दा बढी क्रिएटर र ४५० भन्दा बढी ब्रान्डसँग सहकार्य गर्दै आएको जनाएको छ। कम्पनीका अनुसार यो साझेदारीले विश्वव्यापी क्रिएटर अर्थतन्त्रलाई थप सुदृढ बनाउने लक्ष्यलाई मजबुत बनाउनेछ।
