इङलिस प्रिमियर लिग अन्तर्गत शनिबार साँझ भएको खेलमा लिग लिडर चेल्सी पराजित भएको छ । चेल्सी चौथो स्थानमा रहेको वेस्टह्याम युनाइटेडसँग ३–२ गोल अन्तरले स्तब्ध भएको छ ।
लन्डन स्टेडियममा भएको खेलमा टियागो सिल्भाले २८औं मिनेटमा गरेको सुन्दर गोलबाट चेल्सीले शुरुआती अग्रता लिएको थियो । तर ४०औं मिनेटमा वेस्टह्यामका मानुएल लान्जिनीले पेनाल्टी मार्फत गोल गरी बराबरीमा ल्याएका थिए । पहिलो हाफ सकिन लाग्दा ४४औं मिनेटमा चेल्सीका मेसोन माउन्टले गोल गरी टिमलाई २–१ को स्थितिमा ल्याएका थिए ।
दोस्रो हाफमा दुबै टिमबाट आक्रमण र प्रत्याक्रमण जारी रहेको थियो, तर तुलनात्मक रुपमा वेस्टह्याम बढी सुदृढ देखिएको थियो । यहीक्रममा ५६ औं मिनेटमा वेस्टह्यामका जेरोड बाओनले डिबक्स बाहिरबाट गरेको सुन्दर प्रहार गोलमा परिणत भएको थियो ।
खेलको अन्ततिर ८७ औं मिनेटमा वेस्टह्यामका आर्थर मासुओकुले गरेको गोल नै निर्णायक भएको थियो । यो जितसँगै वेस्टह्यामले १५ खेलबाट महत्वपूर्ण २७ अंक बटुल्दै शीर्ष चारमा स्थान बनाएको छ ।
चेल्सी भने १५ खेलबाट ३३ अंक सहित लिगको शीर्ष स्थानमा छ तर आजै दोस्रो र तेस्रो स्थानमा रहेका म्यान्चेस्टर सिटी र लिभरपुलका पनि खेल छन् । म्यान्चेस्टर सिटीले खेल जितेमा पहिलो स्थानमा पुग्नेछ भने लिभरपुलले पनि खेल जितेमा दोस्रो स्थानमा रहने छ, तर चेल्सी तेस्रो स्थानमा झर्नेछ । एजेन्सी
