newsplar.com
काठमाडौँ । बारा र पर्सामा आइतबार साँझ आएको हावाहुरीमा परी हालसम्म २७ जनाको मृत्यु भएको छ । ज्यान गुमाउनेमा १२ जना पुरुष र १० महिला छन् । त्यसमा ५ जना बालबालिकासमेत छन् ।
हावाहुरीका कारण ४ सय भन्दा बढी घाइते भएका छन्। घाइतेहरुको काठमाडौँ, वारा, पर्सा र रौतहटका अस्पतालमा उपचार भइरहेको छ। हुरीका कारण रुख, विजुलीका पोल ढल्दा धेरै मानवीय क्षति भएको हो ।
घाइतेको उपचार र उद्दारमा कुनै कमि आउन नदिने सरकारले घोषणा गरेको छ । उद्धारका लागि नेपाली सेना, प्रहरी, सशस्त्र प्रहरी परिचालन गरिएको छ।
घरमाथि बिजुलीको पोल, रुख ढलेका छन् । चल्दै गरेका सवारी साधन दुर्घटना भएर मृत्यु भएको सुरक्षाकर्मीले बताएका छन्।आँधीले बाराको फेटा गाउँपालिकामा धेरै ठूलो क्षति पुर्याएको बताइएको छ । त्यस गाउँपालिकाको वडा नं १ मा सबैभन्दा बढी क्षति पुगेको अधिकारीहरुले जनाएका छन् ।
सो क्षेत्रमा पक्की घरको छाना नै आँधीले उडाएको छ । फेटा गाउँ पालिका र भर्वलियामा धेरै क्षति पुगेको छ । ती क्षेत्रमा रहेका करिब ३ हजार घरमध्ये करिब ८० प्रतिशत क्षति पुगेको स्थानीयको भनाई छ । त्यस्तै पुरैनियामा पनि त्यस्तै क्षति पुगेको छ ।
त्यस क्षेत्रमा पुगेको क्षतिको अवस्था हेर्दा त्यसअघि कहिल्यै त्यस्तो नभएको र आँधीले मात्र त्यस्तो हुन नसक्ने जस्तो देखिएको छ । रुखहरु उखिलिएका छन् भने पक्की घरै छाना उडाएको देखिन्छ । यसरी हेर्दा त्यहाँ भूकम्पले क्षति पुगेकोजस्तो देखिएको छ । घरहरु भूकम्पमाजस्तै भग्नावशेषमा परिणत भएका छन् । ठूलो संख्याका उद्धारकर्मीहरु त्यहाँ खटेका छन् ।
आँधीको कारण के हो ? अहिलेसम्म नेपालको तराई भूभागमा यस्तो आँधी आएको कसैलाई याद छैन ।
कहिलेकाहीँ आउने हावाहुरीले केही कच्ची घरका छाना उडाउने गरेको भए पनि यो रुपमा आँधी आएर यतिविधी क्षति भने पुर्याएको थिएन । स्थानीय बयोबृद्धहरुले पनि सो अनुभव सुनाइरहेका छन् ।
मौसम विद्हरुले भने हावाहुरीको लक्षण देखेका थिए तर यो रुपमा यति शक्तिशाली आँधी आउला भन्ने अनुमान भने उनीहरुले नगरेको बताउँछन् । यो के मौसम परिवर्तनको असर हो त भनी उठेको प्रश्नमा पनि उनीहरु अहिले नै यसै भन्न सकिने अवस्था नरहेको बताएका छन् ।
धेरै जना घरवार बिहिन भएपछि बिभिन्न राहत सामग्रीहरु अहिले प्रभावित क्षेत्रमा लैजाने क्रम जारी रहेको छ । राहत कार्यक्रम लिएर सामान् भन्दा सामान्य व्यक्ति ेदखि नाम चलेका व्यक्तिसम्म पनि पुगेका छन् ।
अहिले सामाजिक संजालमा भाइरल भएका व्यक्तिहरुमा डाक्टर गोविन्द केसी, संचारकर्मी रवि लामिछाने र कलाकार सिताराम कटेल (धुर्मुस) पनि बिभिन्न राहत लिएर पुगेका छन् ।
के गर्दै छन् रवि लामिछाने ?
संचारकर्मी लामिछाने सोमबार साँझ पुरैनिया क्षेत्रमा पुगेका थिए । उनले सोमबार नै पुरैनिया क्षेत्रमा राहत वितरण गरेका थिए । उनले तत्काललाई चाहिने सामग्री चामल, चाउचाउ र अन्य कुरा पनि लगेका थिए ।
उनले हिजो मंलबार न्यूज २४ कार्यक्रममा आएर सहयोगमा जुट्न समेत आग्रह गरेका थिए ।
के गर्दै छन् सिताराम कटेल (धुर्मुस) ?
कलाकार तथा समाजसेवि कटेलपनि फेटा गाउँपालिका–६ को पुरैनिया पुगेका छन् । उनले सोमबार दिउँसो ४ सय थान त्रिपाल, ९ क्विन्टल चामल र ४ सय कार्टुन चाउचाउ पुरैनियाका वडाअध्यक्ष जाकिर हुसेनलाई हस्तारन्तरण गरेका थिए।
के गर्दै छन् डा.केसी ?
डा.गोविन्द केसी पनि हावाहुरीबाट घाइते भएकाहरूको उपचार गर्न प्रभावित बारा जिल्ला पुगेका छन् । केसी बाराको फेटास्थित पुरनियाँ गाउँ पुगेका हुन् । उनले त्यहाँ स्वास्थ्य शिविर चलाउने छन् ।
केसी सोमबार बारा गएका थिए । फेटा बाराको सबैभन्दा बढी हावाहुरी प्रभावित ठाउँ हो ।
संघीय सरकारले पनि हावाहुरी प्रभावित जिल्लामा त्रिपाल र कपडा पठाएको छ । गृह मन्त्रालयको विपद व्यवस्थापन महाशाखाका अनुसार सशस्त्र प्रहरीको ट्रकमार्फत ४६८ वटा त्रिपाल बारा र पर्सातर्फ पठाएको छ ।
४ हजार १६८ थान कपडा पनि त्रिपालसँगै पठाइएको छ ।
नेपाल रेडक्रस सोसाइटी बारा शाखाले हावाहुरीका कारण बारामा १ हजार ५ सय २ घरधुरी प्रभावित भएको प्रारम्भिक तथ्याङक निकालेको छ। अहिले पनि पिडितहरुलाई खान र बस्नको समस्या रहेको छ।
राजपाले पिडितहरुको लागि पाँच लाख आर्थिक सहयोग गरेको छ भने काँग्रेसले १० लाखको सहयोग गर्ने आश्वासन दिएको छ । यता नेकपाले भने एक दिनको तलव दिने घोषणा गरिसकेको छ ।
